Vendimi i vitit 2011 i ish-ministrit Nenad Rashiq, për mospranim të aplikacioneve për reparacion pas 1 majit të po këtij viti, është pengesa kryesore për dëmshpërblim të familjeve të viktimave civile, thuhet në raportin e Fondit për të Drejtën Humanitare në Kosovë (FDH), të publikuar të mërkurën, shkruan Koha Ditore.
Raporti ka trajtuar problemet e familjeve të viktimave civile për qasje në reparacion, me theks të veçantë te komunitetet pakicë dhe është prezantuar në një tryezë ku të pranishëm kanë qenë edhe përfaqësues të institucioneve.
Për këtë raport janë intervistuar 150 familje të viktimave të luftës, shumë prej të cilave janë ballafaquar me këtë ndalesë administrative. Ata kanë treguar se kanë shkuar në zyrat komunale dhe në Departamentin e Familjeve dhe Invalidëve të Luftës në MMPS, por janë kthyer duarthatë ngaqë vendimi i 2011-s ua ka pamundësuar aplikimin. Vendimi në fjalë është shfuqizuar për dy kategori, atë të personave të zhdukur dhe kategoritë e veteranëve të UÇK-së dhe invalidëve të luftës. (b.an)
