Kryeministri i ri i Kosovës, Ramush Haradinaj, në ditën e parë të punës si shef i ekzekutivit ka shkarkuar Murat Mehen dhe Komisionin Shtetëror për Demarkacion, të cilin Meha e drejtoi.
Kryeministria ka njoftuar se nga sot ky Komision do të drejtohet nga ish-deputeti i LDK’së Shpejtim Bulliqi, i cili ka për detyrë të krijojë një komision të ri për demarkim.
“Kryeministri i Republikës së Kosovës, Ramush Haradinaj, i ka propozuar Qeverisë shkarkimin e Komisionit Shtetëror për Demarkacion dhe njëkohësisht e ka caktuar ekspertin e njohur të Kosovës, profesor Shpejtim Bulliqi, që ta krijojë ekipin për të marrë përgjegjësitë për krijimin e Komisionit Shtetëror për Demarkacion”, thuhet në njoftim.
Meha dhe Haradinaj kishin pasur përplasje të ashpra mes tyre për demarkacionin me Malin e Zi. Madje, kreu i AAK’së sa ishte në opozitë i kishte përplasur Mehës, në një komision parlamentar, hartën që shënonte vijën kufitare të Kosovës me Malin e Zi.
Haradinaj dhe AAK’ja kanë kundërshtuar nga fillimi Demarkacionin me Malin e Zi, duke pretenduar se Kosova po humb territor, dhe rishikimi i saj ka qenë një nga premtimet e para të kryeministrit të ri, para se të marrë detyrën./a.m.
