Do të jenë 71 rrugë në Tiranë që qytetarët do të duhet të paguajnë për të parkuar makinën. Bashkia e Tiranës ka hartuar një projektvendim, ku parkimi në rrugët kryeqytetit dhe në sheshe do të jetë me pagesë. Tarifat variojnë nga 20 lekë deri në 100 lekë ora. Në rrugët kryesore për të parkuar makinën duhet të paguani 100 lekë ora. Parkimi me pagesë do të jetë nga ora 7:30 deri në orën 20:00 të mbrëmjes. Sipas vendimit që ka siguruar “shqiptarja.com”, Bashkia e Tiranës ka parashikuar që rreth 60% e parkimit të jetë me pagesë ndërsa 40% do të jetë pa lekë, ku do të shfrytëzohet nga banorët autoktonë, invalidët dhe pjesa tjetër e qytetarëve.
Në projektvendim thuhet se parkimi të jetë me pagesë si në rrugë por dhe në sheshe që do krijohen nga bashkia, si rasti i Sheshit “Italia”. Parkimi me pagesë do të jetë duke filluar nga dita e hënë në të premten, ndërsa në rastet kur do të ketë aktivitete sociale apo ekonomike, me pagesë do të jetë edhe fundjava. Bashkia do të kufizojë edhe qëndrimin në disa rrugë, ku nuk do të lejohet qëndrimi më shumë se dy ore ose më shumë se 4 orë.Të gjitha rrugët e renditur në tabelë do të jenë me pagesë, ndërsa periferia e Tiranës dhe njësitë administrative që i janë bashkuar me reformën territoriale nuk do të duhet të paguajnë për parkimin. Bashkia e argumenton vendosjen e pagesës për 71 rrugë, me arsyen se niveli i kërkesës për parkim është shumë i lartë, çka sjell trafik. Gjithashtu, në projektvendim bashkia thotë se kjo nismë ndërmerret edhe për të ulur nivelin e ndotjes.
Me pagesë
Do të jenë tri zona me pagesë, ku çmimi më i ulët do të jetë 20 lek ora.
Zona A përfshin zonat më të nxehta ku mbizotërojnë shërbimet tregtare, financiare apo sociale me intensitet të lartë. Në këtë zonë gjendet një pesë e mirë e aktivitetit të Administratës Publike, qendra biznesi, banka, lokale etj. Në këtë zonë tarifa e parkimit në rrugë do të jetë 100 lekë ora. Mungesa e biletës do sanksionohet me gjobë 3 mijë lekë.
Zona B, mbizotërojnë shkëmbimet tregtare e financiare me intensitet mesatar. Qëndrimi i automjeteve zgjat 1-3 orë. Pagesa për parkimin në rrugë do të jetë 40 lekë ora. Mungesa e biletës sanksionohet me gjobë 1 mijë lekë.
Zona C, përfshin rrugë ku nuk ka shumë intensitet të automjeteve. Rrugët sekondare shfrytëzohen nga banorët për parkim. Tarifa për parkimin në rrugë do të jetë 20 lekë ora. Mungesa e gjobës sanksionohet me gjobë 500 lekë.
“Të gjitha zonat e tjera të parkimit në rrugë që nuk përfshihen brenda zonave të shërbimit të parkimit, do të jenë parkim i lirë, parkim për rezidentët dhe pa pagesë. Bashkia e Tiranës do të pajisë banorët rezidentë me autorizime përkatëse për evidentimin e tyre në zonën e administrimit të parkimit ku banojnë”, – thuhet në projektvendimin e bashkisë.
Zona 1
Me kufij vijën kufizuese të qytetit të Tiranës në pjesën Veri-perëndimore, bulevardin “Zogu I” në anën lindore dhe kordonin hyrës në rrugët “Lazi Miho”, “Konferenca e Pezës”, duke vazhduar përgjatë bulevardit “Gjergj Fishta” në anën jugore deri në ndërprerjen me bulevardin “Dëshmorët e Kombit”.
Zona 2
Me kufij zonën përgjatë bulevardit “Zogu i I” në pjesën perëndimore, vijën kufizuese të qytetit të Tiranës në pjesën Veri-Lindore dhe zgjatimin e bulevardit “Zhan D’Ark” deri në vijën kufizuese në anën jugore.
Zona 3
Me kufij segmentin e bulevardit “Dëshmorët e Kombit” në anën perëndimore, bulevardi “Bajram Curri” dhe përgjatë lumit të Lanës deri në vijën kufizuese në anën veriore dhe vijën kufizuese të qytetit të Tiranës në pjesën jug-lindje.
Zona 4
Me kufij kordonin hyrës përgjatë rrugës “Konferenca e Pezës” në anën veriore, bulevardin vijën kufizuese të qytetit të Tiranës në anën lindore, zonën përgjatë segmentit të bulevardit “Dëshmorët e Kombit” në pjesën lindore dhe vijën kufizuese të Tiranës pjesën jugore të saj.
/Shqiptarja.com
