Fyerjet dhe gjestet antisportive të tifozerive në stadium kanë shtyrë Komisionin e Disiplinës në FSHF që të veprojë menjëherë me “dorë të hekurt” ndaj skuadrave problematike. Kësisoj, në mbledhjen e ditës së sotme, Skënderbeu dhe Flamurtari janë dënuar me gjoba të majme për shkak të sjelljes së papërshtatshme të tifozerive të tyre, me shifra të cilët janë sa dyfishi i asaj që KDS jepte zakonisht gjatë sezonit të kaluar.
Për më tepër, KDS ka bërë të qartë se nëse dy klubet nuk “disiplinojnë” mbështetësit e tyre, mund të përballen me masa edhe më drastike në të ardhmen. Vendimet vijnë në një periudhë kur si Flamurtari, ashtu edhe Skënderbeu kanë hapur dyert e stadiumeve të tyre duke bërë hyrjen falas për të afruar sa më shumë tifozë, por mund të jenë të detyruar t’i mbyllin nëse mbështetësit vazhdojnë me fyerjet e ofendimet në tribuna.
Vendimet e Komisionit të Disiplinës
- KF “Skënderbeu”, për sjellje të gabuar të tifozëve, dënohet me 200000 (dyqind mije) lekë gjobë, bazuar në nenin 66/1 KDS si dhe paralajmërohet se në rast përsëritje do të aplikohen masa më të rënda disiplinore.
- Zv.trajneri i KF “Luftëtari”, Marko Jovanoviç, për protesta ndaj vendimeve të zyrtarit të ndeshjes, dënohet me 2 (dy) ndeshje pezullim nga aktiviteti sportiv, bazuar në nenin 56/1.a të KDS.
- KF “Flamurtari”, për sjellje të gabuar të tifozëve, dënohet me 200000 (dyqind mije) lekë gjobë, bazuar në nenin 66/2 KDS si dhe paralajmërohet se në rast përsëritje do të aplikohen masa më të rënda disiplinore.
ma.me
