Një gjykatë apeli në Paris ka shpallur fajtorë kompanitë Airbus dhe Air France për vrasje nga pakujdesia korporative lidhur me rrëzimin tragjik të avionit Rio-Paris në vitin 2009, ku humbën jetën 228 persona.
Vendimi vjen pas një beteje ligjore që zgjati 17 vjet dhe konsiderohet një moment i rëndësishëm për familjet e viktimave, kryesisht francezë, brazilianë dhe gjermanë, të cilët prej vitesh kërkonin drejtësi për katastrofën më të rëndë ajrore në historinë e Francës.
Gjykata urdhëroi Airbus dhe Air France të paguajnë gjobën maksimale prej 225 mijë euro secila, pas kërkesës së prokurorëve gjatë procesit gjyqësor tetë-javor.
Në vitin 2023, një gjykatë më e ulët i kishte shpallur të pafajshme të dy kompanitë, të cilat kanë mohuar vazhdimisht akuzat ndaj tyre.
Megjithatë, familjarët e viktimave e konsiderojnë vendimin e fundit si një njohje të vuajtjeve dhe betejës së tyre shumëvjeçare, edhe pse gjobat janë cilësuar nga opinioni publik si simbolike krahasuar me të ardhurat e kompanive.
Fluturimi AF447 u zhduk nga radarët më 1 qershor 2009, ndërsa po udhëtonte nga Rio de Janeiro drejt Parisit, me persona nga 33 shtete në bord. Kutitë e zeza të avionit u gjetën dy vite më vonë në fund të Oqeanit Atlantik.
Hetimet zbuluan se ekuipazhi kishte humbur kontrollin e avionit pasi sensorët ishin ngrirë gjatë një stuhie të fortë, ndërsa prokurorët akuzuan kompanitë për trajnim të pamjaftueshëm dhe mosmarrje masash pas incidenteve të ngjashme të mëparshme.
Sipas mediave franceze, priten apelime të tjera në gjykatën më të lartë të Francës, çka mund ta zgjasë procesin edhe për disa vite të tjera.
