Një zënkë në familje mes kunatave është bërë shkak i një sherri të rëndë mes vëllezërve, që nuk kanë ngurruar të nxjerrin edhe armët brenda në shtëpi. Ngjarja ka ndodhur në Bathore të Tiranës dhe Policia ka arrestuar njërin nga protagonistët, shtetasin Krenar Lita, i cili ka kërcënuar me armë gruan e vëllait të tij.
Nga ana tjetër, Policia ka nisur procedim penal edhe për xhaxhain e tij, shtetasin me iniciale G.L., i cili është kryefamiljar në shtëpinë ku ndodhi sherri, pasi iu gjetën një sasi fishekësh. Gjithashtu po hetohet në gjendje të lirë edhe bashkëshortja e të arrestuarit, 30-vjeçarja N. Lita, e cila, sipas Policisë, ka ushtruar dhunë psikologjike ndaj dy vëllezërve të burrit.
Sipas Policisë, gjithçka ka nisur pas një zënke banale mes grave të dy vëllezërve e më pas sherri ka përshkallëzuar duke përfshirë të gjithë anëtarët e familjes së madhe prej dhjetëra anëtarësh. Në mbrojtje të gruas, 35-vjeçari Krenar Lita ka marrë një armë gjahu tip “Shotgun”, që xhaxhai i tij e mbante me leje, dhe ka kërcënuar kunatën e tij, shtetasen A.H., 34 vjeçe, me të cilën ishte konfliktuar e shoqja.
Pas këtij momenti, në mes janë futur edhe dy vëllezërit e tjerë, kunatat dhe xhaxhai, duke tentuar të mbyllin konfliktin. Të lajmëruar nga fqinjët, forcat e Policisë të Komisariatit nr.5 kanë shkuar menjëherë në vendngjarje, duke parandaluar një krim të mundshëm në familje.
NGJARJA
Policia e Tiranës tha dje se mbrëmjen e së enjtes është arrestuar shtetasi Krenar Lita, 35 vjeç, banues në Tiranë, si dhe u referuan materialet në Prokurori për gruan e tij, N. Lita, 30 vjeçe, dhe xhaxhain e tij, G. Lita, 76 vjeç.
Shoqërimi i tyre në Polici u krye pasi në Rrugën e Arbrit, në Kamzë, Krenar Lita ka kanosur me armë gjahu kunatën e tij, shtetasen A.H., 34 vjeçe, banuese në Tiranë dhe ka ushtruar dhunë fizike e psikologjike ndaj vëllait të tij, F. Lita, 44 vjeç. Ndërsa shtetasja N. Lita, bashkëshortja e Krenarit, ka ushtruar dhunë psikologjike ndaj kunetërve të saj.
Shtetasit Krenar Lita iu bllokua në cilësinë e provës materiale arma e gjahut, tip “Shotgan”, të cilën e ka me leje, ndërsa xhaxhait të tij G. L., iu gjetën e iu bllokuan në cilësinë e provës materiale 94 copë fishekë, të kalibrit 7.62 mm.
Shtetases A. H., kunatës së autorit, iu plotësua kërkesëpadia për lëshimin e urdhrit të mbrojtjes së menjëhershme. Policia tha dje se në ngarkim të bashkëshortëve janë referuar materialet në Prokurori me akuzën e kanosjes dhe për dhunë në familje.Ndërsa për kryefamiljarin, xhaxhanë e të arrestuarit, është ngritur akuza e mbajtjes pa leje të armëve e municioneve luftarake.
ma.me
