Udhëheqësit e Bullgarisë, Serbisë, Greqisë dhe Rumanisë bënë së bashku thirrje për paqe dhe prosperitet në Ballkan, si edhe për aderimin e Serbisë në Bashkimin Europian.
“Vendet e rajonit duhet të kthehen në një shembull të stabilitetit dhe begatisë, e kjo është në interesin e qytetarëve, por edhe biznesit”, deklaroi kryeministri bullgar Boyko Borissov, në konferencën për shtyp të mbajtur pas takimit në Varna, me homologët grek e rumun, Alexis Tsipras dhe Mihai Tudose, si dhe presidentin serb Aleksandar Vuçiç.
“Vendi i natyrshëm i Serbisë – shtoi ai, – është në BE”. Këtyre komenteve i bëri jehonë edhe shefi i ekzekutivit grek. Beogradi, sipas Tsipras e meriton një aderim të shpejtë. Ai shtoi se të 4 vendet, 3 nga të cilat janë tashmë anëtare të Bashkimit Europian, mund të luajnë një rol kyç në zhvillimin e rajonit.
“Kemi vendosur jo vetëm të kemi një bashkëpunim më të ngushtë me njëri-tjetrin në lidhje me fushën e energjisë, makroekonomisë dhe transportit, por edhe të përmirësojmë atë ekzistues në raport me menaxhimin e krizave, sigurinë dhe krizën e refugjatëve. Diskutuam gjithashtu edhe mbi projekte të mëdha të përbashkëta në rajon. Nëse ato mund të realizohen duke kapërcyer kufijtë, Ballkani do të tjetërsohet i gjithi”, tha Alexis Tsipras, kryeministër i Greqisë.
Kryeministri rumun Tudose u përqëndrua te veprimi i përbashkët në çështjet e energjisë, e sidomos te koordinimi i mirë i projekteve infrastruktore. Vuçiç, nga ana e tij, shprehu mirënjohje për mbështetjen e përcjellë nga udhëheqësit e tjerë lidhur me anëtarësimin e Serbisë, e shtoi se së bashku, të 4 vendet ballkanike mund të bëjnë shumë për të pasur më pak probleme nga sa kanë sot.
Shqipëria dhe Maqedonia, të paftuarat e Varnas
Jo aksidentalisht pa Shqipërinë dhe Maqedoninë katër vende të rajonit kanë nisur një axhendë bashkëpunimi që sipas ty lidhet me kursin Europian të Ballkanit Perëndimor.
Greqia, Bullgaria, Rumania dhe Serbia mbajtën në Varna samitin e parë katër-ditor me pjesëmarrjen e kryemministrave të 3 vendeve që janë anëtare të BE-së dhe presidentit serb, Aleksandër Vuçiç.
Nismëtare e këtij samiti është Greqia, si anëtari më me përvojë dhe më i vjetër i BE-së, në një përpjekje për të treguar se ruan ende një rol udhëheqës në rrjedhën evropiane të vendeve të Ballkanit Perëndimor.
Në këtë kuptim nuk është e rastësishme që Shqipëria dhe Maqedonia nuk u ftuan të jenë pjesë e samitit, pasi janë dy vende me të cilat Athina zyrtare ka konsumuar përplasje politike vitet e fundit.
Sipas Huffington Post, rezultatet “praktike” të takimit përfshijnë marrëveshjen për t’i paraqitur një kërkesë të përbashkët Komisionit dhe presidentit Juncker për të siguruar fonde evropiane për lidhjen hekurudhore Selanik-Varna.
“Nuk është një samit për një shkëmbim pikëpamjesh.
Janë tre vende të Bashkimit Evropian dhe një vend që ka të drejtë të shkojë shpejt përpara në Bashkimin Evropian.
Në thelb në Varna u vendos që të ringjallim “axhendën e Selanikut 2003″ në lidhje me integrimin e vendeve të Ballkanit në BE”- deklaroi Tsipras.
Samiti i dytë u ra dakord që do të mbahet në Beograd.
