Vëllai i Hekuran Dedës, një nga të vrarët e protestës së 21 janarit 2011 në Tiranë, ka deklaruar se i janë ofruar pará nga ish-kryeministri Sali Berisha, vetëm tre ditë pas varrimit të të ndjerit. Zabit Deda i ka bërë këto deklarata në një intervistë me Gazetën Shqiptare, të publikuar sot.
“Unë mendoj se ish-kryeministri Sali Berisha duhet të ishte brenda, se është ai që ka dhënë urdhër”, thotë Zabit Deda. Ai më ka sjellë dhe njerëz te shtëpia, më ka sjellë valixhen me lekë”.
Më tej, Zabiti shpjegon se paratë i janë çuar nga truproja i Berishës.
“Më ka çuar ish-badigardin, s’e di a e ka tani shoqërues a nuk e ka, s’e di, se nuk jam interesuar. (Ka ndodhur) tri ditë pas varrimit të vëllait”.
Ai shton edhe se “nuk e di shumën, kishte valixhen brenda në bagazh të fuoristradës”, por di shkakun e kësaj oferte: “Për të pranuar Berishën të vinte në shtëpi që të na ngushëllonte”. Vëllai i Hekuranit nuk i ka pranuar paratë, duke u përgjigjur se “unë nuk e shes gjakun e vëllait me lekë”.
Ndërkaq, për vendimin e fundit të Gjykatës së Lartë për të rrëzuar rekursin e Prokurorisë së Përgjithshme, Deda thotë se është një vendim i ndikuar nga politika dhe se nuk mund të jetë ndryshe për sa kohë që Berisha është në parlament.
Ai thotë se do ta çojnë çështjen deri në Gjykatën Kushtetuese dhe në Gjykatën e Strasburgut.
“Do bashkohemi të gjithë familjarët, do bëhemi grup e do ta çojmë në Strasburg. Do t’i kërkojmë gjithashtu qeverisë shqiptare të na ndihmojë me dokumentet. Strasburgu do ta vërë drejtësinë”, thotë Zabit Deda.
BW/d.i.
