Kandidati i Partisë Socialiste për kryetar të Bashkisë së Tiranës, Erion Veliaj ka zbardhur detaje nga biseda që ka zhvilloi ditën e sotme me shefen e misionit të OSBE-ODIHR, Audrey Glover, duke theksuar se për ndërkombëtaret zgjedhjet e 30 qershorit janë të shenjta. Duke folur gjatë emisionit “Përballë” në TVSH ai tha se pavarësisht debatit të krijuar nga opozita, ndërkombëtarët janë të bindur se zgjedhjet duhet të mbahen në 30 qershor.
“Ajo që ndodhi sot është se u informova mbi si po shkonte puna në Tiranë dhe faktin që do kemi disa dhjetra vëzhgues ndërkombëtarë në Tiranë, me misionin afatshkurtër përtej misionit afatgjatë dhe pa asnjë dyshim për datën 30, pra për komunitetin ndërkombëtar data 30 është datë e shenjtë dhe taksapaguesit e shumë vendeve po paguajnë që stafet e ministrive të jashtme të tyre të jenë në Tiranë”, tha Veliaj.
Ai bëri të ditur se takimi ishte informues, ndërsa gjatë ditës së nesërme do të nisin të mbërrijnë edhe vëzhguesit afatshkurtër të OSBE-ODIHR që do monitorojnë nga afër procesin zgjedhor.
“Ishte një takim rutinë që ndodh me gjithë kandidatët. Domethënë, bashkitë janë ato që sigurojnë vendet e votimit, vendet e numërimit, janë hapësirat, le të themi zhvillohen tubimet, manifestimet, ndaj besoj hyn tek takimet rutinë. Ajo që pashë është që misioni afatgjatë i OSBE është stacionuar në të 12 qarqet, për datën 30 qershor dhe ndërkohë, duke filluar nga nesër fillojnë e mbërrijnë misionet afatshkurtër që janë ata që qëndrojnë një javë, le të themi, 3 ditë para , 3 ditë pas dhe më pas shpërndahen në lokacione më të imta, në ato që quhen le të themi mikrohapësira, bashki më të vogla apo qendra rurale apo shohin le të themi votime specifike, persona me aftësi të kufizuar, votimi në burgje”, tha Veliaj.
