Për kreun e Bashkisë së Kryeqytetit Erjon Veliaj, Tirana është e papërgatitur për emergjencat që duhet të përballë, si në rastin e ditës së dielë, ku shirat e rrëmbyer krijuan jo pak probleme për dhjetëra familje e biznese por po ashtu edhe probleme në furnizimin me ujë e elektricitet.
Gjatë prezantimit të projekbuxhetit të vitit 2016 për njësinë administrative nr 4, Erjon Veliaj theksoi se pavarësisht faktit se Lulzim Basha nuk bëri asnjë gjë në 4 vite në krye të Tiranës, tashmë administrata është duke menduar për zgjidhje afatgjata të këtij problemi.
“Më vjen mirë që, edhe pse qyteti që kemi trashëguar është totalisht i papërgatitur për emergjencat, unë besoj se në këto 24 orë kemi treguar që të paktën punës i rrimë te koka dhe nuk i bëjmë bisht asaj. Kemi pasur një bashki që thoshte: ‘Kemi një vizion për këtë, një vizion për atë’, por s’kishte vizion as për të kulluar ujin. Një shi dhe Tirana përmbytet. Sigurisht, lajmi i mirë është që, situata në Tiranë ishte shumë herë më e mirë se sa nërrethet të tjera, por nga kjo situatë duhet të marrim disa leksione”, u shpreh kryebashkiaku.
Nisur nga gjendja e krijuar për shkak të shirave, Veliaj bëri të ditur se bashkia që ai drejton do të prishë çdo ndërtim mbi kolektorë apo kanal kullues, në mënyrë që situata të tilla të mos ndodhin më.
Duke prekur problematikën me ujin e Liqenit të Bovillës, Veliaj theksoi se për shkak të prurjeve të pakontrolluara, ndërtimeve pa kriter, si dhe dëmtimit të filtrave të kullimit, gjatë ditës së sotme uji ishte i papërdorshëm. Gjithsesi, ai bëri të ditur se po punohet që kjo gjendje të marrë fund dhe qytetarët të furnizohen normalisht me ujë të pijshëm.
