Pas dëmve që iu shkaktuan Tiranës me protestën e 8 dhjetorit dhe vetëm pak ditë larg nga protesta e rradhës, Kreu i Bashkisë Erjon Veliaj i ka bërë thirrje Partisë Demokratike që të mos vandalizojnë më qytetin.
“Kjo është një javë ku qyteti sërish mirëpret protestën e radhës. I lus organizatorët e protestës, që të mos jetë sërish një protestë vandale! Ne nuk do të hezitojmë që të penalizojmë sërish cilindo që shkul një pllakë, që vjedh një pusetë, cilindo që pret një pemë ose që dëmton dekorimet në qytetin tonë. Në qytet, gjërat bëhen në bashkëpunim” ka thënë Veliaj.
Kreu i bashkisë së kryeqytetit foli gjatë inspektimit të punimeve në rrugën Dpn Bosko, ku dhe dy ditë më parë u hoq dhe u zhvendos një shtyllë e tensionit të lartë, gjysma e së cilës qëndronte në mesin e rrugës.
Veliaj shtoi se në rrugën kryesore të Don Boskos do të ketë trotuare si dhe kanalizime të reja, për të shmangur edhe përmbytjet që ndodhin shpesh në këtë zonë.
“Bashkia do të vazhdojë investimet në rrugën “Don Bosko” me të njëjtin standard me të cilin ka investuar në rrugën paralel që është rruga “Dritan Hoxha”. Ne do të kujdesemi që 190 milionë lekë të investohen në trotuaret e rrugës “Don Bosko” (ju e dini fare mirë që një pjesë e përmbytjeve të Tiranës shkaktohen në këtë rrugë), do të sigurohemi që të ndërhyjmë edhe në kanalizime, për t’u siguruar që ka një lidhje të kolektorëve të ujit”, u shpreh Veliaj.
Ndërkohë, drejtori i OSHEE, Adrian Cela, tha se, vërtetë po bëhen investime, por primare është edhe jeta e qytetarëve. Ai ka shtuar se, në bashkëpunim me Bashkinë e Tiranës, gjatë muajit të kaluar janë spostuar 6 shtylla të tilla që ishin kthyer në “gangrenë” në akset rrugore të qytetit, ndërkohë që kanë mbetur edhe dy shtylla të tjera në zonën e Freskut të cilat do të spostohen këto ditë.
