Ka përfunduar mbledhja e kryesisë së Partisë Socialiste, mbrëmjen e sotme, ndërsa në përfundim të saj Kreu i Bashkisë së Tiranës Erion Veliaj ka dhënë një prononcim për mediat.
Në fjalën e tij ai tha se së bashku me Partinë Socialiste dhe Bashkinë e Tiranës janë ndezur motorrët për një fitore bindëse në zgjedhjet e 18 Qershorit. Sipas Veliajt, ajo që ka rëndësi është që gjërat të funksionojnë në ekip, për të mirën e vendit.
Veliaj i cilësoi tensionet në koalicion si telenovela të së shkuarës.
“Partia Socialiste i ka ndezur motorët për fitore në zgjedhje. Dhe jo vetëm që do dalim forca e parë, por kjo moto është forca jonë. Unë e kuptoj urinë mediatike, por ato reforma dhe ato ndryshime, janë përgjigja më e mirë për çdo lloj qytetari. Ndaj them që harxhimi i kohës me telenovela të së shkuarës nuk i vlejnë askujt. Unë kam qenë në qeveri, dhe e di që funksionon si ekip. Dhe besoj se ekipi është më i rëndësishëm. Ne si media, si shoqëri, jemi të interesuar në të mirën e vendit. Këto janë temat që kanë rëndësi, për këtë u mblodhëm, dhe kjo do na sjellë fitoren në zgjedhje.” tha ai
Sa i përket shkarkimit të Ylli Manjanit nga posti i Ministrit të Drejtësisë, Veliaj tha se qeveria funksionon si ekip me kapiten Edi Ramën, dhe është ky i fundit që vendos për ekipin.
“Unë nuk jam anëtar i qeverisë, por në këtë ekip kapiten është Edi Rama. Dhe është kapiteni që vendos për ekipin dhe fatin e lojtarëve se kush qëndron dhe kush jo.” tha ai
Kryebashkiaku i Tiranës e mbylli fjalën duken thënë se koalicioni me LSI është strategjik dhe shkon përtej një mandati.
“I kam ndezur motorrët për një partneritet kryesor. Me LSI është një projekt strategjik. Unë besoj si të gjithë ata që besojnë tek e majta, është një koalicion përtej një mandat.” përfundoi Veliaj./b.d
