Kandidati i koalicionit të majtë për Bashkinë e Tiranës, Erion Veliaj, mori sot mbështetjen e Partisë Drejtësi Integrim dhe Unitet për zgjedhjet e 21 qershorit në kryeqytet.
I pranishëm në hapjen e fushatës së PDIU në Pallatin e Kongreseve, kandidati i Aleancës për Shqipërinë Europiane, nën një atmosferë entuziaste, falënderoi të pranishmit dhe gjithë anëtarët e PDIU për mbështetjen e madhe që do t’i japin në garën elektorale të Tiranës.
Ai premtoi se në krye të Bashkisë së Tiranës, në mbledhjen e parë Këshilli Bashkiak do të miratojë sheshin “Çamëria”.
“Me përfaqësuesit e PDIU kemi një shans fantastik që në Tiranë të bëjmë disa gjera konkrete, duke filluar nga mbledhja e parë e Këshillit Bashkiak për të pasur edhe në Tiranë sheshin “Çamëria”, ashtu siç e do historia jonë, ashtu siç e do bashkëjetesa jonë, ashtu siç e do patriotizmi ynë. Kjo është Tirana e jonë, Tirana e të gjithëve”, premtoi Veliaj.
