Pak ditë pas marrjes së detyrës, kryetari i Bashkisë së Tiranës, Erion Veliaj, ka nisur menjëherë nga puna për mbajtjen e njërit prej premtimeve të tij gjatë fushatës elektorale. Ai ka njoftuar sot shpalljen rezervuarit të Vaqarrit dhe pyllin që e rrethon, si Parkun e dytë të Bashkisë së Tiranës, pas parkut të Liqenit Artificial. I shoqëruar edhe nga kryetari i Këshillit Bashkiak, Aldrin Dalipi, Veliaj vizitoi nga afër këtë park, ndërsa i ka kërkuar administratorit të kësaj njesie që të marrë masat e nevojshme që në një kohë sa më të shpejtë, parku të jetë i arritshëm për banorët e zonës së Kasharit dhe të Njësive të tjera të afërta.
“Është një lajm shumë i mirë që sot po shpallim park të Bashkisë së Tiranës këtë park që komuna e vjetër e ka ruajtur, i cili do te merret menjëherë në ruajtje nga Bashkia, për t’u zhvilluar në një park i cili ka sot 97 ha me pisha dhe me një rezervuar. Ky do të jetë parku i dytë i Tiranes, pas atij të Liqenit Artificial, për t’i dhënë kryeqytetit edhe një hapësirë tjetër te gjelber, por sidomos banorëve të Kombinatit, të njësisë 6 dhe 7, banorëve të Vaqarrit. Bashkia do te sigurohet që këto 97 ha te jene një hapësirë për rreth 97 mijë banorë që kanë shumë nevojë për një hapësirë të gjelbër sepse ashtu siç kuptuam edhe gjate fushates, njerëzit kërkojnë më shumë parqe se sa beton” u shpreh Veliaj në anonçimin e këtij vendimi.
Më heret Veliaj prezantoi administratorin e njesise Vaqarri, Genti Myrtaj, ku edhe njoftoi ndërhyrjet e para që ka bërë bashkia në disa fusha, si dhe kërkoi që administratorët të marrin territorin në administrim për të mos lejuar më degradimin e situatës. Ai gjithashtu kërkoi pjesëmarrjen e banorëve të kësaj njësie në aksionin e 4 shtatorit për pastrimin e Tiranës. “Dua shumë që i gjithë Vaqarri të jetë në këmbë në datën 4 shtator dhe të kemi një aksion në administratë, me të rinj, me familjarë dhe të sigurohemi që akset kryesore, buzët e lumenjve, parqet, çdo hapësirë tjetër të shkëlqejë. Këtë e kemi vetë në dorë”, tha Veliaj.
