Pavarësisht temperaturave të larta që shoqërojnë këto ditë gushti, Bashkia e Tiranës duket e vendosur që t’i kthejë qytetit normalitetin, si në shërbime, ashtu edhe në ambientin e përbashkët. Krahas masave që ka marrë në vënien në punë të të gjitha shërbimeve për qytetarët, Bashkia e re në këto ditë të para të sajat, i ka kushtuar një vëmendje të veçantë pastrimit dhe rehabilitimit të hapësirave publike.
Gjatë fundjavës, veç pastrimit të përditshëm të qytetit, puna ka filluar edhe në Bulevardin “Dëshmorët e Kombit”, ku po bëhet rikonstruksioni i guralecëve të trotuareve dhe atyre rreth pemëve. Punonjësit e Ndërmarrjes nr.2 të Bashkisë së Tiranës po punojnë për të meremetuar pjesët e dëmtuara të trotuareve duke i zëvendësuar ato me gurët origjinalë.
Vetë kryebashkiaku Erion Veliaj duket se po i ndjek nga afër të gjitha punët publike që po kryhen në Tiranë, sepse edhe këtë operacion e ka pasqyruar me një postim në Tëitter. “Gur gur, bëhet mur. Çdo ditë nga një punë, pas 4 viteve rrënim, punëtoret e qytetit i rikthehen Bulevardit e shesheve”, shkruan ai.
Ndërkaq, veç Bulevardit, punëtorët e ndërmarrjes nr.2 në Tiranë janë përqendruar edhe në pastrimin e mbeturinave nën urat e lumit Lana, por edhe në rregullimin dhe pastrimin e skarpateve të saj. Me sa duket, Tirana po merr formën e një qyteti të pastër, çka do të kulmojë me aksionin e madh qytetar për pastrimin e saj në 4 shtator, në të cilin Veliaj ka ftuar gjithë qytetarët e kryeqytetit.
