Kryebashkiaku i Tiranës Erjon Veliaj deklaroi se shumë shpejt institucioni që ai drejton do të prezantojë një aplikacion të quajtur “Tirana ime”, që do ti mundësojë qytetarëve të raportojnë për problematikat por edhe të kontrollojnë shërbime siç mund të jetë trafiku i makinave, pastrimi apo problemeet me ujësjellësin.
Ky projekt u prezantua nga Veliaj gjatë fjalës që mbajti në “Forumin ndërkombëtar për promovimin e qyteteve inteligjente – sfidat dhe mundësitë”, i zhvilluar në Durrës ku merrnin pjesë krerë të pushtetit vendor.
“Shumë shpejt ne do të lëshojmë një aplikacion që quhet “Tirana ime” të cilin çdo qytetar i Tiranës do të ketë mundësi ta shkarkojë dhe është i bazuar në një eksperiencë shumë të ngjashme që ne kemi përdorur në fushatë. Atëherë quhej ‘Unë për Tiranën’, kjo quhet‘Tirana Ime’, ku u kërkonim qytetarëve që të fotografonin dhe të ngarkojë në një template gjithë problematikën e Tiranës”, u shpreh Veliaj.
Ai bëri të ditur se me anë të aplikacionit çdo qytetar nga telefoni i tij vetëm duke klikuar në të mund të marrë informacionin e duhur se si është gjendja e trafikut në çdo rrugë të Tiranës. “Platforma është e tillë që çdo njeri nëse është në kategorinë e ndotjes apo trafikut, të bëjë diçka për trafikun për shembull. Kemi hartën e trafikut në Tiranë, për shembull, në çdo moment me një kod ngjyrash do të shfaqet se si duket ekzaktësisht trafiku”,sqaroi kryebashkiaku.
Gjithashtu në kuadër edhe të modelit “Smart City”, kreu bashkisë ka paralajmëruar edhe një sërë iniciativash të tjera që do lehtësojnë shumë më tepër angazhimin e qytetarëve në marrjen e shërbimeve burokratike. Për këtë ai theksoi se pretendohet se 75 % të shërbimeve që merren aktualisht në zyrat e administratës lokale, të mund të merren duke përdorur teknologjinë, pa qenë nevoja mbajtja e radhës në sportele.
