Pak ditë më parë, Gjykata e Tiranës i dha të drejtë pretendimeve të kryebashkiakut Erion Veliaj dhe njohu zyrtarisht Eduard Prodranin si drejtues të ligjshëm të Federatës Rajonale të Futbollit në Tiranë, çka detyroi më pas edhe Federatën Shqiptare të Futbollit dhe Armand Dukën të bënte të njëjtën gjë.
Një fitore e Veliajt kjo, i cili nuk lejoi të manipuloheshin zgjedhjet në Tiranë.
Në një intervistë sot për Top Channel, Veliaj tha se për sa kohë do të jetë në Bashkinë e Tiranës, nuk do të lejojë manipulimin e asnjë gare në kryeqytet.
“Jam shumë i kënaqur që në Tiranë gjykata mori një vendim, i cili thotë: “Në këtë qytet ti nuk mund të vjedhësh vota, në këtë qytet nuk mund të manipulosh gara”. Për sa kohë që unë drejtoj këtë qytet, nuk do të lejoj të manipulohet asnjë garë, qoftë kjo edhe për senatin e shkollës, sepse besoj se këtë qytet e mban “fairplay” dhe gara e ndershme”, tha ai.
Veliaj shprehet se beteja për transparencë dhe për garë të ndershme në futboll duhet të ndiqet edhe nga kryebashkiakët dhe drejtuesit e tjerë për klubet e tyre. “Për sa kohë që gjykata më dha të drejtë, duke njohur kryetarin e Shoqatës Rajonale të Tiranës sipas Asamblesë legjitime, ftesa për gjithë të tjerët është që edhe ata të bëjnë betejat e tyre. Luftova në Rrogozhinë dhe në Vorë sepse drejtoj Qarkun e Tiranës, luftova për shoqatën e Tiranës sepse jam kryetar i Bashkisë së Tiranës. Por, fjala vjen, për SHRF-në e Kukësit duhet të kujdeset kryetari i Bashkisë së Kukësit, edhe për SHRF-në në Vlorë duhet të kujdeset pronari i Flamurtarit. Pra, do të bëj të gjitha ato beteja nën juridiksionin që kam unë, por secili duhet të bëjë betejat e veta. Në qoftë se secili bën betejat e tij, Shqipëria shkon përpara”, nënvizoi kreu i Bashkisë.
Veliaj siguroi se bashkia që ai drejton do të jetë një partner me Shoqatën Rajonale të Futbollit, për të çuar përpara projektet në fushën e sportit.
“Jam krenar që klubi i Tiranës është klubi i Izmir Smajlit, që është kampioni Ballkanik sot, është klubi i Luiza Gegës, që gjithashtu u shpall kampione Ballkanike, është klubi i Briken Çaljas, që u shpall kampion bote. Për të gjitha këto arsye jam krenar që fituam betejën në Tiranë dhe Shoqata Rajonale e Futbollit e drejtuar nga z. Prodani, do të gjejë te Bashkia e Tiranës të njëjtin aleat që kemi pasur edhe te “Fahrie Hoti” për basketbollin dhe volejbollin, edhe tek Parku Olimpik, edhe tek fushat e tenisit, edhe tek një pafundësi fushash futbolli. Zotohem publikisht se do t’i jap maksimumin shoqatës me lidershipin e ri të futbollit në Tiranë, për të promovuar të rinjtë që një ditë duan të bëhen Ronaldo dhe Messi”, u shpreh Veliaj./m.j
