Kreu i Bashkisë Tiranë ka folur sot pas reagimeve të Partisë Demokratike në lidhje me gjobën e dëmeve të protestës. Në një reagim, referuar edhe ‘kastravecit’ që Basha përmendi një ditë më parë, Veliaj tha se ‘Basha kastravec hyri e ashtu doli nga Bashkia’.
Erion Veliaj, iu përgjigj mediave pasditen e sotme duke se deklaruar se qyteti do të fitojë mbi vandalët. Ndërsa hodhi poshtë të gjitha pretendimet e PD-së për çështjen e gjobës, kryebashkiaku theksoi se bashkëngjitur kësaj gjobe ndodhet edhe fleta e dëmeve që do t’i dalë për zot. “Për sa kohë që unë i kam dalë vetë zot dhe vetë kam firmosur gjithë dëmet, nuk kam nevojë të fshihem pas askujt sepse i ka vënë emrin tim dhe ia kam drejtuar fletën e dëmeve dhe firmën time kryetarit të PD që ishte institucioni, ekipi, skuadra, organizata që kërkoi leje për aktiviteti”, deklaroi Veliaj.
Ai tha se nuk do të lejojë që askush të vandalizojë Tiranën dhe të mos paguajë dëmet. “Nuk do lejojë kurrë që PD ta bëj lesheli Tiranën dhe pastaj unë si kujdestar i Tiranës t’ i fus dorën në xhep qytetarëve që s’ kanë bërë asnjë faj, që atë ditë ishin në shtëpinë e tyre dhe t’ ju them: ‘ Na jepni lekët tuaja, s’ do bëjmë çerdhe , kopshte dhe shkolla, se ne do rregullojmë ça prishin vandalët’. Ça u bë këtu?! Ky është vendimi që kam marrë, nesër do të keni detaje të tjera, Agjencia e Mbrojtjes së Konsumatorit , Ndërmarrja nr. 2, secila sipas pjesëve që mbulon, do keni fotografitë e çdo lloj dëmi”, tha Veliaj.
