Grante për financimin e prodhimit të produkteve për fermerët është oferta e kandidatit të koalicionit të majtë për Bashkinë e Tiranës, Erion Veliaj, për banorët e zonave rurale, të cilat me reformën territoriale i janë bashkuar Bashkisë së Tiranës. Gjatë prezantimit të programit të tij për zonën e Zall-Herrit, Veliaj theksoi se bashkia do të krijojë më shumë mundësi për aplikimet për fondet bujqësore në institucionet e Bashkimit Europian.
“Për herë të parë, bashkia do të fillojë të japë grante për projekte konkrete. Ngritja e një Qendre të Këshillimit dhe Mbështetjes për Zonat Rurale pranë bashkisë do t’i ndihmojë fermerët, jo vetëm financiarisht, por edhe që të aplikojnë për ato produkte dhe ide që i duhen fshatit tonë”, deklaroi Veliaj.
Ai sqaroi se kjo qendër do të rikthejë konceptin e SMT-ve, ku bashkia do të ketë një bazë të ekonomizuar, e cila jepet me kosto pa fitim për gjithë fermerët e zonës.
Kandidati Veliaj tha se përmes projektit për zhvillimin e ekonomisë rurale, do të koordinojmë të gjithë ata fermerë që duan të bashkëpunojnë, duke bashkuar mjetet e tyre. Sipas tij, duke krijuar këtë lloj bashkëpunimi midis fermerëve, rriten edhe mundësitë për të thithur më shumë fonde.
“Për 8 vite kemi hasur disa situata qesharake ku importonim bar nga Maqedonia sepse i dinim nevojat e tregut. Ajo që na duhet tani është një bashki që ndihmon me më shumë informacion”, tha Veliaj.
Ai tha se do të caktohen zona ku fermerët e Zall-Herrit mund të tregtojnë gjatë fundjavës.
“Duam të përcaktojmë zona për tregje të përhershme dhe zona për tregje të përkohshme ditore, ku në Tiranë do të ketë 4 pika hyrëse, në njërën prej të cilave do të ketë përparësi Zall-Herri”, shtoi Veliaj.
Zotimet për Zall-Herrin
1. Mbulimi i Zall-Herrit me linja të transportit publik;
2. Ndërhyrje në infrastrukturën vaditëse, e cila është amortizuar;
3. Ndërtojmë urën e Pinares
4. Rikonstruksion i rrugës Çekrezë-Ksallë-Qinam
5. Rikonstruksion i ujësjellësit Qinam
6. Rikonstruksion i rrugës Dritas, lagja qendër Baqosht
