Pak ditë para zgjedhjeve në Rrogozhinë, drejtuesi politik i Partisë Socialiste për Qarkun e Tiranës, Erion Veliaj ka deklaruar se kandidati i Koalicionit “Bashkë Fitojmë”, Shkëlqim Hoxha i ka kërkuar një marrëveshje për rezultatin në këtë bashki. Gjatë takimit me banorët e Kryevidhit, Veliaj tha se ka refuzuar një kërkesë të tillë.
“Ky që kemi përballë, më çoi fjalë para disa ditesh, më tha: ‘Kam harxhuar shumë në fushatë, po m’i kompensuat, unë iki vetë’. Meqë e donte përgjigjen nga unë, po ia jap live: Ne pazar me bixhozxhinjtë, që e trajtojnë miletin si plaçkë për t’ia çuar Saliut dhe për t’i thënë – “ja i bleva kecat” – nuk bëjmë. Ne nuk jemi parti pazaresh. Fakti që ai po kërkon pazar, do të thotë se nuk i ka ikur mentaliteti i bixhozxhiut”, u shpreh Veliaj.
Duke mos i kursyer akuzat për rivalin e kandidatit të PS, Edison Memolla, Veliaj shprehu bindjen për fitoren e PS më 23 korrik.
“Së dyti, unë besoj se trimat rrinë në luftë deri në fund. Së treti, unë besoj se atë burrë, që e trajton Rrogozhinën si një markatë kecash, që i blen votat si të jenë keca, do ta mundim me një fitore të pastër”, tha Veliaj.
Ditën e diel qytetarët e Rrogozhinës do u drejtohen përsëri kutive të votimit për të zgjedhur kryetarin e bashkisë, pasi rezultati i 14 majit u shpall i pavlefshëm.
/a.r
