Kandidati i ASHE-së për bashkinë e Tiranës, Erion Veliaj zhvilloi të mërkurën në mbrëmje fushatës përmbyllëse në njësinë nr.6 në Kombinat në periferi të kryeqytetit.
Në fjalën e mbajtur përpara qindra simpatizantëve të pranishmëve Veliaj deklaroi se, qytetarët e Tiranës janë trishtuar në 4 vitet e fundit duke parë një bashki që nuk punonte aspak për ta, ndërsa u shpreh ai, pas 4 ditëve, gjithçka do të ndryshojë për kryeqytetin.
“Kemi qenë në çdo rrugë të Kombinatit dhe kemi takuar njerëz të trishtuar nga stresi i një bashkie që nuk punon. Ngrini kokën dhe në datën 21 qershor ta marrim sërish Tiranën tonë”, tha Veliaj.
Kandidati i majtë premtoi se në mandatin e tij të parë do të ndriçojë rrugët, do të pastrojë mbeturinat dhe do të ketë më shumë kopshte e shkolla. Teksa u bëri thirrje banorëve të Kombinatit për të votuar ASHE-në në 21 qershor, Veliaj theksoi se, “duhet të bëheni pjesë e ndryshimit për Tiranën, që do e çojë kryeqytetin në drejtimin e duhur”.
I pranishëm në këtë takim në njësinë nr.6, ministri i Punëve të Brendshme, Saimir Tahiri tha se për katër vite me radhë qytetarët e Tiranës kanë pritur që kryetari aktual i bashkisë të bëjë diçka për ta.
“Miqtë e mi, jeni kaq shumë këtu sot dhe faleminderit që prisni në këmbë që prisni 2 orë në këmbë. por ne kemi 4 vite që presim që bashkia të bëjë diçka për ne. më thoni e kush më thotë nga ju se kur ka qenë hera e fundit që Basha ka ardhur në Kombinat. Nga këtu tha që do bëjë tramvajin, por ku e ka? Tha se do pastronte Tiranën, por a e ka bërë? Tha se do ndërtonte shkolla e çerdhe, por e ka zënë gjumi. Qytetarët e Tiranës kanë më dinjitet sesa kryetari i bashkisë. Kombinati meriton një kryetar bashkie që punon 24 orë. Pamë që kishte ngarkuar fugonat për të liruar zyrën, le të ik se nuk e duam.”, tha Tahiri.
