Pas përfundimit të investimeve të mëdha në Tiranë, kryebashkiaku Erion Veliaj tha sot se në dy vitet në vijim fokusi i punës së Bashkisë do të jetë përmirësimi i infrastrukturës në ish-komunat, të cilat me reformën e re territoriale janë pjesë e kryeqytetit. Duke bërë një bilanc të punës 2-vjeçare në zonën e Farkës, Veliaj deklaroi se Bashkia do të ndërhyjë në të gjitha ish-komunat me investime.
“Ju e dini fare mirë se si ka shkuar vlera e tokës gjatë kësaj periudhe, ku vetëm falë faktit që ne kemi investuar në këtë komunitet, vlera e pronës është rritur disa herë. Plani është që të vazhdojmë me këtë ritëm, madje do të punojmë akoma më shumë në periferi, në nivel fshati, njësoj si çdo familje, e cila pasi mbaron së rregulluari me dhomën e pritjes, nis nga puna për dhomat e tjera të shtëpisë. Ky është plani edhe për Tiranën”, shtoi Veliaj.
Ai kërkoi mbështetjen për kryeministrin Rama edhe për një mandat të dytë, si garanci për vijimin e investimeve në të gjithë kryeqytetin. “Zgjuar mund të bësh punë, në gjumë nuk mund të bësh punë. Dhe kur pala tjetër sjell si kandidat atë që e kishte Tiranën katër vite dhe nuk e bëri dot, i them njerëzve: kur ai nuk bëri dot punën e Lali Erit, punën e Edi Ramës nuk e bën dot. Nëse të ngec sahati katër vjet, fiks 12:00, kur nuk ke takat të shtrish autoritet 3 metra nga zyra jote, çfarë autoriteti do të kesh në 28 mijë kilometra katrorë që ka Shqipëria, dhe që ka nevojë të jesh zgjuar dhe të jesh si Edi Rama, energjik dhe me ide për t’i shkuar punëve deri në fund”, u shpreh Veliaj.
Një nga investimet që përmendi Kryebashkiaku Veliaj është dhe ajo te zona e Bregut të Lumit, ku Bashkia e Tiranës ka përfunduar ndërtimin e 18 rrugëve, 1 shkollë, 1 kopsht dhe një çerdhe, ndërsa ka nisur puna edhe për shumë projekte të tjera. /b.d
