Çështja e legalizimeve dhe rrugët e shkatërruara ishin dy nga shqetësimet kryesore që banorët e njësisë 7 në Tiranë, i shprehën kandidatit të koalicionit të majtë për Bashkinë e Tiranës, Erion Veliaj.
Në fjalën e tij me banorët Veliaj tha se sot kemi 400 pallate që janë pa hipotekë dhe ndryshe nga 4 vjet më parë kur kryebashkiaku aktual premtonte dhënien e hipotekave, ato nuk u dhanë kurrë.
“Për 4 vjet këtu s’është vënë asnjë send, asnjë tullë dhe rrugët janë copë copë”, u shpreh një banor. “Mua më intereson rruga dhe të bëhen legalizimet”, tha një tjetër.
“Në këtë rrugë jetojnë edhe të majtë, edhe të djathtë. Dy zgjidhje kemi: ose u japim edhe një shans të na gënjejnë ata që na gënjyen për 4 vjet, ose ndërrojmë dhe provojmë dikë që e ka treguar me punë se ç‘di të bëjë. Ndaj them, kur na gënjyen një herë, faji ynë, por kur na gënjejnë dy herë s’kemi shans tjetër”, tha Veliaj gjatë takimeve të tij me banorët e zonës.
Deputetja e PS Vasilika Hysi, tha se “në 2005 këtu u zgjodh deputet Basha, i cili premtoi shumë, por po të shikoni këtu nuk është bërë asgjë. Edhe në 2013 erdhi për të marrë vota, por shikojeni rrugën se si është”.
“Dy herët e para paska bërë Luli gol, edhe kur mori votat për deputet, edhe për kryetar bashkie. Në datën 21 qershor kemi ndeshjen e kthimit. T’i bëjmë një gol dhe ta çojmë në shtëpi”, tha Veliaj.
