Më 20 janar në Tiranë do të zhvillohet konferenca e partnerëve “Tirana Smart City 2016-2026”, ku do të prezantohen 100 projekte për Tiranën dhe ku do të afrohen shumë donatorë për financimin e tyre. Lajmi u bë publik nga kryebashkiaku Erion Veliaj, gjatë një takimi me përfaqësues të PNUD dhe donatorëve të ndryshëm që kanë financuar bashkinë në disa projekte.
“Nuk jemi të fokusuar në zgjedhjet e ardhshme, se sa në gjeneratën e ardhshme të Tiranës që të gjithë qytetarët meritojnë. Arsyet pse quhet smart city është se kemi nevojë për qytet inteligjent, jo për faktin që duhet të kenë akses në informacion por qytet që menaxhon jetën, cilësinë e ajrit, të ushqimit, të transportit, shkollave. Kur flasim për një qytet inteligjent flasim për një qytet që menaxhon cilësinë e ajrit, shkollave, shëndetit publik etj. Kjo është hera e parë që organizojmë një konferencë me donatorët që financojnë projektet e Bashkisë Tiranë. Këtu po lypim ndihmë dhe partneritet. Ne do prezantojmë 100 projekte për Tiranën, nga infrastruktura e deri tek projektet për turizmin. Një prej tyre do të jetë terminali multimodal i transportit. Siç e dini ne kemi një terminal të përkohshëm te ish-dogana, do ndërtojmë një terminal të përkohshëm tjetër në Sauk për mjetet që vijnë nga lindja. Por këto janë të përkohshme deri në finalizimin e terminalit multimodal”, -tha Veliaj.
Në këto 100 projekte përfshihen ai bulevardit të ri të Tiranës, pagesa online e taksave, parkimi, vendosja e kamerave në kryqëzime të ndryshme, si dhe terminali modal i transportit etj.
