Kandidati i Aleancës për Shqipërinë Europiane për Tiranën, Erion Veliaj, sot ka zhvilluar takimin e radhës në Njësinë 8. Para të rinjve dhe jo vetëm, Veliaj tha se koha e Berishës dhe Bashës ka mbaruar dhe se koha e atyre që mbajnë pushtetin duke vrarë ka marrë fund.
“Ky është një vend që sa kohë të ketë Saliun dhe Lulin, çdo të riu që i futet politikës, ata do i bëjnë analizën. Por, unë i them të rinjve të kenë kurajo pasi koha e Saliut dhe Lulit ka mbaruar. Koha e njerëzve që mbajnë pushtetin duke vrarë, ka mbaruar. Tirana do të shkojë në drejtimin e duhur”, theksoi Veliaj.
Sa i përket akuzave që Veliajt i bëhen nga PD, ai u shpreh:
“Nuk kam komplekse nga e shkuara ime pasi kam bërë atë jetë që ka bërë çdo shqiptar i ndershëm. Jam krenar për jetën dhe familjen time pasi familja ime nuk ka vrarë njeri më 21 Janar”.
