Kandidati i koalicionit të majtë për Bashkinë e Tiranës, Erion Veliaj, tha sot se zgjedhjet e 21 qershorit janë zgjedhje për familjet tona, për problematikat të cilat të gjithë ne i diskutojmë në tavolinën tonë të bukës. Në dëgjesën e zhvilluar sot paradite me punëtorët e zonës industriale në Tiranë, Veliaj tha se aktualisht kryeqyteti nuk është vend i mundësive, ndaj duhet çuar në drejtimin e duhur.
“Këto zgjedhje nuk janë zgjedhje për partitë, por janë zgjedhje për familjet tona. Temat për të cilat ne flasim në këto zgjedhje janë tema për të cilat flasim edhe në tavolinat tona të bukës, kur bëjmë pyetje si: në cilën çerdhe do ta çojmë fëmijën, a kemi çerdhe në lagjen apo fshatin tonë, a kemi çerdhe që i mban, ndërsa jemi në punë? Temat e kësaj fushate janë tema të familjes”, tha Veliaj.
Ai tha se njerëzit nuk duan të dëgjojnë barsaleta dhe se këto zgjedhje nuk janë për të nëpërkëmbur dinjitetin e grave dhe vajzave. “Unë kam respekt për të gjitha ato nëna, të cilave u bëhen gishtat gjak, por ama kanë një punë të ndershme. Ndaj dhe respektoj këdo që punon këtu në zonën industruale të Tiranës. Më mirë të jesh askushi dhe të jesh i ndershëm sesa të jesh dikushi dhe të kesh marrë njerëz më qafë. Prandaj, i bëjmë këto zgjedhje që ccdo njeri sot të ndihet dikushi”, u shpreh Veliaj.
