Kryetari i Bashkisë së Tiranës Erion Veliaj i është përgjigjur pedagogut Jamarbër Malltezit lidhur me çështjen e ndërtimit të një shkolle të re në Kodër Kamëz.
Përmes një postimi në Twitter, kryebashkiaku Veliaj në mënyrë ironike uron Malltezin “të dhëntë Zoti jetë sa më të gjatë që ta shkatërrosh gjer në fund partinë e vjehrrit tënd”.
Veliaj shprehet se asnjë socialist nuk do e kishte ëndërruar se PD-ja do të degjeneronte gjer aty sa të protestonte kundër ndërtimit të një shkolle të re 9-vjeçare për fëmijët e Kodëz-Kamzës në një tokë private, ndërkohë që kjo forcë vetë për vite me radhë lejoi zaptimin e hapësirave të Universitetit Bujqësor nga bastet.
“Ty or çun të dhëntë Zoti jetë sa më të gjatë që ta shkatërrosh gjer në fund partinë e vjehrrit tënd! Që do e degjeneroje PD-në të protestonte shkollën 9-vjeçare të Kodër Kamzës në tokë private e jo zaptimet e basteve në UBT, nuk e kishte ëndërruar asnjë socialist! Jepi gaz!” – shkruan kryebashkiaku i Tiranës.
Një ditë më parë, nën cilësinë e pedagogut, Jamarbër Malltezi protestoi pranë fidanishtes së UBT, i shoqëruar nga një grup studentësh.
Sipas tij, për ndërtimin në fjalë ka disa shkelje ligjore sepse siç tha ai “nuk ka asnjë tabelë që informon për godinën që do të ndërtohet, se kush po e ndërton dhe nuk është respektuar asnjë procedurë”.
/a.rada
