Katër vjet pasi Këshilli Bashkiak i Tiranës kishte vendosur t’i jepte titullin “Qytetar Nderi”, prof. Kristo Frashërit, ka qenë kryebashkiaku i Tiranës, Erion Veliaj, ai që ia ka dorëzuar këtë titull akademikut dhe historianit të njohur. Në një ceremoni të organizuar në ambientet e Bashkisë së Tiranës, ku ishin të pranishëm familjarë të historianit të njohur, kryebashkiaku Veliaj i akordoi titullin Prof. Frashërit, i cili ishte miratuar me vendim të Këshillit Bashkiak që në vitin 2012, me propozim të grupit të këshilltarëve të majtë.
Vonesa për marrjen e titullit nga akademiku i njohur duket se ka lidhje me ish kryebashkiakun, Lulzim Basha, i cili edhe pse Këshilli Bashkiak që në 2012 e kishte ngarkuar t’i jepte titullin prof. Frashërit, Basha kishte refuzuar ta bënte këtë gjë.
“Në emër të qytetarëve të Tiranës, nderojmë Prof. Dr. Kristo Frashëri me titullin “Qytetar Nderi” për kontributin e çmuar në evidentimin e vlerave historike të qytetit të Tiranës. Kam privilegjin e madh t’ju ofroj titullin e nderit, të shpallur me vendimin Nr. 6, datë 23 Mars 2012 dhe t’ju garantoj të gjitha të drejtat e patjetërsueshme, që burojnë prej tij”, thuhet në titullin e firmosur nga kryetari i Bashkisë së Tiranës.
Prof. Frashëri ka një prodhimtari shkencore që mbulon një periudhë 70-vjeçare. Ai ka botuar me dhjetëra artikuj studimorë, referate historike, vëllime dhe monografi shkencore, që trajtojnë ngjarje, personalitete dhe procese të historisë së Shqipërisë. Historiani Frashëri mban shumë vlerësime, ndër të cilat janë dhe “Mjeshtër i madh” dhe “Nderi i Kombit”.
