Bashkia e Tiranës ka ngritur një treg të veçantë në Vishnje të Baldushkut, për tregtimin e gjësë së gjallë, në prag të festave të fundvitit. Kjo për të shmangur edhe shitjen e gjësë së gjallë nëpër trotuaret e kryeqytetit. Kreu i Bashkisë Erion Veliaj shprehu idenë për krijimin e një agjensie tregjesh e cila do të nxisë rritjen e standarteve të tyre në kryeqytet, gjatë pjesëmarjes së tij në Universitetin Bujqësor të Tiranës.
“Këtë fundjavë hapim tregun e gjësë së gjallë në një zonë ku rriten gjelat më të mirë të detit në Shqipëri, si zona e Baldushkut. Për të gjithë fermerët e zonës, që shesin gjelat e Baldushkut, por jo vetëm, do të kemi tregun e gjësë së gjallë në Vishnje, në një zonë rurale shumë pranë qytetit, duke e vlerësuar këtë edhe si një mënyrë për t’i nxjerrë njerëzit nga Tirana, e sigurisht për të ofruar një sistem higjenik, ku veterinerët dhe inspektorët tanë kontrollojnë vazhdimisht higjienën e ushqimit”, u shpreh sot Veliaj.
Kryebashkiaku i Tiranës tha se shumë shpejt do të krijohet një agjenci e tregjeve, si një pikë takimi mes atij që prodhon produkte bujqësore dhe konsumatorit.
“Sot në Tiranë kemi vetëm një pikë kryesore të grumbullimit të produkteve bujqësore, e cila është e pamjaftueshme, ndaj do të investohemi në krijimin e disa pikave të tjera të grumbullimit. Do të duhet të bëjmë disa politika, jo vetëm për të promovuar produktet lokale, por edhe tregjet rajonale, sipas zonave. Në qytet kemi një anomali të plotë dhe besoj se jeni dakord me mua se gjëja e gjallë nuk mund të shitet në mjedise publike, pa kontroll”, u shpreh Veliaj.
