Erion Veliaj tashmë kryetar i ri i bashkisë së Tiranës me mbi 43 mijë vota ndaj rivalit të tij Halim Kosova, ka zyrtarizuar fitoren në bashkinë e kryeqytetit. Përmes një pronocimi për mediat, Veliaj theksoi se këto zgjedhje vendore treguan vullnetin e popullit për të çuar Tiranën në drejtimin e duhur.
Veliaj falenderoi të gjithë qytetarët, aleatët e mazhorancës, kryeministrin Edi Rama dhe Kryeparlamentarin Ilir Meta për mbështetjen e dhënë gjatë kësaj kohe. Kryebashkiaku i ri falenderoi edhe kundërshtarin Kosova dhe të gjithë rivalët e pavarur për bashkinë e Tiranës për fushatën qytetare elektorale larg politikës së akuzave.
“Të dashur qytetarë të Tiranës. Kjo është një ditë jashtëzakonisht e rëndësishme për mua. Nëse ka dikush që ishte dyshues për reformën e re administrative, nëse ka dikush që ishte cinik për qytetarinë e këtij vendi, nëse ka dikush skeptik për qeverinë tonë, votimet treguan se ne jemi drejtimi i duhur për Republikën e Shqipërisë. Me këtë fitore, shumica e shqiptarëve vendosi që ta çojë Shqipërinë në drejtimin e duhur. Për këtë jemi krenarë dhe të përulur. Falenderoj të gjithë mbështetësit e aleatëve tanë të Aleancës për Shqipërinë Evropiane. Dua të falenderoj nga zemra kryeministrin dhe kryeparlamentarin për këtë fitore spektakolare. Dua gjithashtu të falenderoj nga zemra, vëllain tim Saimir Tahirin. Kjo është një fitore e jashtëzakonshme, që numërohet dhe thellon edhe më tej fitoren tonë. Merita për këto zgjedhje të lira dhe të ndershme nuk i kemi vetëm ne, por edhe kundërshtari ynë Halim Kosova që meriton gjithë respektin tonë që u nda nga politika e shpifjeve. Gjej rastin të falenderoj të gjithë ata që morën pjesë në këtë garë elektorale. I them me gjithë respekt doktor Halimit dhe kandidatëve të tjerë se ka më shumë gjëra që na bashkojnë se sa na ndajnë, dhe pres bashkëpunimin e të gjithëve.” u shpreh Veliaj
Kryebashkiaku bëri të ditur se kjo fitore spektakolare është në të njëjtën kohë edhe përgjegjësi të cilën ai premtoi se do ta mbajë mbi shpatulla duke punuar çdo ditë 24 orë për banorët dhe kryeqytetin.
Po ashtu Veliaj i bëri thirrje administratës së bashkisë që të vijojë normalisht shërbimin ndaj qytetarëve deri sa të bëhet tranzicioni dhe të mos përsëritet rasti i fundit i vitit 2013 ku ku administrata e vjetër abuzoi duke lënë arkën bosh.
“Fitorja jonë me mbi 43 mijë vota, është realisht shumë e madhe, por jemi shumë të përulur, dhe jemi të vetëdijshëm që qyteti nuk i ka punët mirë. Ndaj do të përveshim mëngët dhe t’i futemi punës. I kërkoj të gjithë aktivistëve tanë që të jemi të përmbajtur. Ne jemi administratorë të këtij qyteti dhe jo pushtues të tij. Kjo fitore i dedikohet njerëzve të thjeshtë, që me një rezultat spektakolar na kërkojnë të mbajmë këtë përgjegjësi. Për të gjithë ata që nuk na dhanë votën ju themi: Ju mund të mos na keni dhënë votën në këtë garë të parë por ne do të ju shërbejmë njësoj. Ne do të ndërtojmë një bashki model sepse Tirana është shtëpia jonë. Unë zotohem të jem kryeshërbëtori juaj 24 orë. I kërkoj administratës së bashkisë së Tiranës të mos ndërpresë punën gjatë kohës së tranzicionit të ekipeve tona, për të shmangur atë që ndodhi në vitin 2013 ku administrata e vjetër abuzoi duke lënë arkën bosh.” përfundoi kryebashkiaku i ri i Tiranës.
