Kryetari i Bashkisë Erjon Veliaj ka vizituar këtë të mërkurë situatën në zonën e Don Boskos, pas lajmërimit se do të ketë një ditë me reshje të mëdha shiu. Veliaj tha se situata është nën kontroll në këtë zonë dhe se në terren aktualisht ndodhen rreth 700 persona, të shtrirë në zonat potencialisht të rrezikuara për tu përmbytur. Veliaj tha se Bashkia nuk mundet që brenda 100 ditëve të transformojë sistemin e kanalizimeve në Kryeqytet. Sipas Kryebashkiakut do duheshin rreth 150 milionë euro për zgjidhjen e kësaj çështjeje dhe rreth 10 vite.
“Nuk mundet që në 100 ditë të transformojmë sistemin e kanalizimeve, investimi është 150 milionë dollarë dhe do duhej rreth një dekadë për të transformuar të gjithë sistemin e kanalizimeve. Përsa i përket Ujësjellësit të Bovillës, uji është sipas të gjitha standarteve dhe sfidoj këdo që tmë sjellë ujë nga çezmja e shtëpisë dhe do ta pi publikisht.”- tha Veliaj.
Kryebashkiaku tha se investimet më të mëdha që do të kryen nga UKT do të kenë në fokus pikërisht kanalizimet. Veliaj tha se Bashkia është në diskutime me Ujësjellës Kanalizimet e Amsterdamit, të cilët do të vijnë për të bërë ekspertizën e kanalizimeve në Tiranë.
Ja zonat potencialisht problematike sipas Bashkisë së Tiranës
“Siri Kodra”, “Don Bosko”, “Imer Ndregjoni”, “Rruga e Kavajës”, “Myslym Shyri”, rruga “Bardhyl”, “Rruga e Dibrës” si dhe segmenti i Unazës, sidomos segmenti “Vasil Shanto” dhe “21 Dhjetori”.
Në raste emergjencash : qytetarët të kontaktojnë Bashkinë e Tiranës në numrin 0800 0888 (nga numrat fiks), Policinë Bashkiake në numrin 04 24 19 465 dhe Zjarrfikëset në numrin 129.
