Pas 21 qershorit, të gjitha bizneset do të trajtohen në mënyrë të barabartë dhe do të shmanget çdo padrejtësi në mbledhjen e taksave. Me këto fjalë iu drejtuar sot përfaqësuesve të biznesit të vogël, kandidati i koalicionit të majtë për Bashkinë Tiranë, Erion Veliaj, në dëgjesën e sotme me këtë grup interesi.
Që në krye të herës, përfaqësuesit e biznesit të vogël shprehën shqetësimin e tyre se në katër vite në Bashkinë e Tiranës, nuk kanë gjetur një partner, por një institucion që i lodh me procedura të zgjatura e shërbime jo efiçente. Veliaj tha se një ndikim negativ mbi konkurrencën ka patur edhe çështja e disiplinës fiskale. Sipas tij, premtimi i Bashkisë për rritjen deri në 2.5 herë të të ardhurave ka mbetur, si shumë premtime të tjera, vetëm në letër.
Në përgjigje të pyetjeve të biznesit, Veliaj deklaroi se Bashkia e Tiranës ka një problem shumë të madh me taksat vendore sepse çdo vit mbledh vetëm gjysmën e tyre, çka do të thotë se vetëm gjysma e bizneseve paguajnë taksa. “Nuk kam dëgjuar që bizneset të ankohen për taksat, por ama ato ankohen për padrejtësinë që u shkaktohet sepse vetëm 30% e tyre i paguajnë dhe 70% jo. Pra, të jesh i ndershëm në Tiranë paska një kosto të lartë dhe kjo logjikë nuk funksionon. Por, dua t’ju them se trajtimi “ca si të nënës e ca si të njerkës” do të marrë fund. Nuk do të ketë më asnjë diferencim”, u shpreh Veliaj.
Ai tha se para 4 vitesh u premtua heqja e 60 taksave e tarifave, por pas një analize doli që ishte hequr vetëm një taksë, ajo e leshit. Sipas tij, bashkia e re do të vendosë drejtësi dhe do t’i trajtojë të gjitha bizneset si të barabartë. Madje, duke filluar që nga fakti se dy përfaqësues të mazhorancës për Këshillin Bashkiak do të jenë nga biznesi.
Duke folur për idenë e tij se edhe pushteti vendor duhet të japë kontributin e tij në ndërmjetësimin e punëdhënësve dhe punëmarrësve, Veliaj tha se edhe bashkitë duhet të bëhen pjesë e garës për hapjen e zyrave të punësimit. “E di se zyrat e punës nuk prodhojnë vende pune, por ama ndërlidhin punën. Nëse e zbatojmë këtë ide në Tiranë, ju garantoj se do t’i hapim vërtet ‘punë’ qeverisë qëndrore”, u shpreh Veliaj.
Nga ana tjetër, ai hodhi edhe propozimin për krijimin e një Këshilli Ekonomik të Bashkisë, ku para do mbledhjeje të Këshillit Bashkiak, të diskutohet çdo vendim që ka të bëjë me çështje të ndjeshme të ekonomisë, taksat e tarifat, apo investimet. Në vijim, ai propozoi që edhe bashkitë të kenë Fondin e tyre për Nxitjen e Punësimit. Një tjetër problem që pjesëmarrësit i kanë paraqitur z. Veliaj ishte se mbështetja ndaj grave që administrojnë biznese të vogla ka qenë inekzistente. Në këto katër vite, nuk është ofruar as edhe një ndihmesë apo lehtësim për bizneset që zotërohen nga gratë. Ai foli për ngritjen e një programi që do të ofrojë mbështetje, konsulencë, por edhe lehtësira fiskale për bizneset që themelohen nga gratë.
Gjithashtu, kandidati i koalicionit të majtë, theksoi angazhimin për të përmirësuar rrënjësisht shërbimet që do të ofrojë Bashkia e Tiranës. “50 mijë bizneset që ushtrojnë aktivitetin e tyre në Tiranë janë motorri i zhvillimit ekonomik dhe punësimit të kryeqytetit, prandaj do të bëhet maksimumi që bizneset të mos sorollaten nga njëra zyrë në tjetrën”, shtoi ai.
Një tjetër projekt ambicioz iniciuar prej kandidatit të majtë, Erion Veliaj, do të jetë edhe themelimit i një Institucioni të ri pranë Bashkisë që do të ofrojë konsulencë falas për orientimin e aktivitetit ekonomik lokal dhe do të ndërmjetësojë bizneset lokale me autoritetet qendrore dhe aktorë të tjerë privatë, si pjesë e sistemit financiar. “Këto janë shërbime që duhet të ofrojë një Bashki dhe që në këto katër vite kanë munguar për shkak neglizhence me postin të Kryetarit aktual në ikje z. Basha”, u shpreh Veliaj.
Si pjesë të vullnetit të tij pozitiv për të zhvilluar një fushatë krejtësisht qytetare, transparente, ku fokusi të jetë çdo individ i Tiranës, Veliaj përsëriti ftesën e tij për debat publik me kundërshtarin e tij politik z. Kosova.
