Nga dita e sotme të gjithë të vegjlit që banojnë në Njësinë nr. 1 do të kenë një çerdhe të re. Kryetari i Bashkisë i Tiranës, Erion Veliaj, ishte sot i pranishëm në inaugurimin e çerdhes nr. 51, e cila ka qenë pjesë e nismës “Adopto një çerdhe” dhe sapo është përfunduar së rikonstruktuari.
“Sot kemi një çerdhe të re, në një lagje e cila e ka pasur të nevojshme rikonstruksionin e çerdheve dhe shtimin e hapësirave për fëmijët. Në këtë çerdhe shtohemi 20% në sipërfaqe dhe në numrin e fëmijëve që mund të akomodojmë”, u shpreh Veliaj. Ai kërkoi që i gjithë komuniteti ta trajtojë këtë godinë, jo si një pronë të bashkisë, por si një pronë të familjeve që kanë lidhur jetën me këto çerdhe.
Çerdhja nr. 51 ishte një ndër 31 godinat që u përfshinë në nismën “Adopto 1 çerdhe” dhe që u morën nën administruan nga biznese apo individë. “Me këtë donacion shkëputemi nga një traditë ku mendojmë për zgjedhjet e ardhshme dhe fillojmë një traditë ku mendojmë për gjeneratën e ardhshme. Kjo është bashkia që ëndërrojnë qytetarët, një bashki që mendon për një brez të ri që do të vijë, që ka nevojë për hapësirë, dashuri dhe ka nevojë për komoditet minimal në vitet e para të jetës”, tha Veliaj.
Kryebashkiaku Veliaj falenderoi kompaninë “Kontakt” që bëri të mundur rikonstruksionin e çerdhes dhe të gjithë vullnetarët që ndihmuan me disa orë pune. “Kur dikush dhuron disa orë nga dita e vet, nuk dhuron vetëm diçka që matet financiarisht, por dhuron një pjesë të jetës së vet”, deklaroi Veliaj. Në kushtet kur Bashkia e Tiranës ka trashëguar një borxh prej 31 milionë dollarësh, Veliaj e ka cilësuar çerdhen e rikonstruktuar si një dhuratë shumë të bukur që i bëhet qytetit.
“Ndonjëherë, nga çdo nevojë dhe çdo e keqe lind një e mirë. E mira që lindi nga i gjithë ky proces është një valë solidariteti dhe dashurie për të cilën Tirana kishte shumë nevojë”, përfundoi Veliaj.
