Kandidati i koalicionit të majtë për Bashkinë e Tiranës, Erion Veliaj, tha se kryetari aktual Lulzim Basha ka dhënë 60 leje ndërtimi në ditët e fundit në detyrë, duke thyer kështu edhe moratoriumin e qeverisë për ndërtimet. Në një dëgjesë me ambietalistët te Liqeni artificial, Veliaj deklaroi se nuk pajtohet me planin rregullues të Bashkisë së Tiranës sepse të gjitha sheshet e kryeqytetit i ka kthyer në sheshe ndërtimi.
“Kur dëgjoj kandidatë që thonë se unë do të ul taksat dhe janë të PD-së, unë i them: uli taksat, ti e ke bashkinë edhe sot, pse s’e bën. Thotë: Unë do pastroj qytetin. Po mirë pastroje qytetin, ti e ke sot edhe bashkinë edhe pastrimin e qytetit. Janë i njëjti ekip, që në fakt dhanë këto leje ndërtimi, i njëjti ekip që solli këtë shkatërrim dhe i njëjti ekip që menaxhon sot qytetin, por ndërkohë na shiten dhe na thonë që ne jemi njerëz të tjerë. Jo, s’janë njerëz të tjerë, janë të njëjtët njerëz! Propozimi ynë ka qenë që të respektojmë moratoriumin e qeverisë. Bashkia nuk e ka respektuar”, deklaroi Veliaj.
Ai tha se është kundër asaj që ka ndodhur në këto 4 vjet në Tiranë me ndërtimet dhe nuk pajtohet me planin rregullues që ka Tirana sot. “Nuk mund të vazhdohet në bashkinë e re me një plan rregullues që të gjitha sheshet e mbetura të Tiranës i bëri sheshe ndërtime. E kam fjalën për atë plan rregullues, i cili shpalli si sheshe ndërtimi 16 hapësira të gjelbra, duke filluar nga lulishtja pas Bibliotekës Kombëtare, nga ajo pas Pallatit të Kulturës, Parku i Namazgjasë, duke qenë se ideja fillestare ishte që të bëhej qendër tregtare në xhami, zona e SHQUP-it, parku i Fushës së Aviacionit, Qytetin Studenti, fushën e sportit prapa stadiumit Qemal Stafa, ish-shkollën Kosova, zonën e fushave të Ali Demit, Ekspozita Shqipëria Sot, zona te 7 Xhuxhat, zona e lulishtes te Vëllezërit Frashëri, ndërtimet mbi Digë, zonën e Shkollës së Bashkuar, zonën e tregut te Medreseja dhe zonën në Kinostudio. Ne do distancohemi nga ky plan dhe do ta anulojmë këtë plan. Nuk është plan për qytetin, është plan për ndërtuesit e pallateve”.
