Kryebashkiaku i Tiranës, Erion Veliaj tha se një parti e cila nuk mbush dot gropat e oborrit të saj, nuk mund të bëjë dot asnjë punë në Tiranë.
“Për të gjithë ata që i sulen shërbimit të pastrimit të Tiranës dhe duan që Tirana të kthehet në kohën e zhulit, e për të gjithë ata që thonë se do i bëjmë të gjithë këto gjëra pa lekë, kam vetëm një gjë për t’u thënë: Shikoni si i kanë selitë e partive tëi tyre! Kaloni përpara selisë së PD-së dhe shikoni si i parkojnë makinat; do kuptoni se ata që nuk dinë të parkojnë tek shtëpia e tyre, nuk rregullojnë dot parkimin në Tiranë. Shikoni si e kanë zënë gjithnjë korsinë e autobusëve, si i vendosin Range Rover-at kalapiç njëra mbi tjetrën, pastaj shikoni asfaltin në oborrin e PD! Plot me gropa! A thua se është selia e një partie në Ukrainë, që sapo është bombarduar.
Një parti që nuk mbush dot gropat e oborrit të saj, do mbushë gropat dhe do asfaltojë Tiranën? Shikoni sa ndërtime pa leje kanë në oborrin e tyre. Kanë tre kafe pa leje, në oborr të tyre. Ata që nuk pastrojnë dot oborrin e tyre nga inertet, nga ndërtimet pa leje, nga trastat, nga hunjtë – ende nuk kanë pastruar hunjtë e sherrit të fundit, kur dogjën partitë e tyre – ata që djegin shtëpinë e tyre, do rregullojnë shtëpitë tona?! Ata që nuk pastrojnë dot plehrat e oborrit të tyre, do pastrojnë Tiranën tonë? Ata që nuk dinë të parkojnë makinat e tyre, do rregullojnë parkimin në Tiranë?!
Ata që nuk i hedhin dot një kovë asfalt? Quaje si të duash, elektoral, demokratik, liri-demokraci, ‘E duam Shqipërinë si gjithë Evropa’, por ata që nuk mbushin dot gropat e tyre, të një oborri partie, do rregullojnë 1250 kilometra katrorë të Tiranës?! Ndaj, motra e vëllezër, kokën lart, se ka vetëm një grup, vetëm një skuadër, ka vetëm një ekip i Bashkisë së Tiranës që mund të pastrojë qytetin, që mund të rregullojë rrugët, të sistemojë trafikun dhe parkimin dhe që mund ta bëjë gjithë këtë pa qenë të idhnuar!”, u shpreh Veliaj.
Veliaj: Fushata jonë moderne, jo me sharje e ndotje
Kreu i Bashkisë së Tiranës dhe drejtuesi politik i PS për Qarkun, Erion Veliaj tha se fushata e Partisë Socialiste do të jetë moderne, siç i ka hije Tiranës së viteve të fundit.
“Kemi marrë një vendim shumë të rëndësishëm dhe sot ky ndoshta është një nga aktivitetet e mia të fundit si kryetar bashkie për mandatin e dytë, pasi futem në garë si kandidat për mandatin e tretë. Di t’ju them një gjë: Vendimi që kemi marrë është se forca jonë politike nuk do prodhojë asnjë poster, nuk do ngjisë asnjë letër, nuk do ketë asnjë konsum që ua shton barrën, mundin, sfilitjen gjatë kësaj fushate.
Duke qenë ne të parët që fondin e fushatës do e çojmë vetëm për gjelbërim, vetëm për më shumë pemë dhe infrastrukturë, që i mbetet qytetit, kemi dhënë shembullin e parë se fushatat elektorale nuk duhet të jenë një harbim kolektiv i prodhimit të mbeturinave. Ajo Tirana e shpartalluar, ku çdo mur i mbushur me postera, çdo shtyllë e mbushur me pankarta, çdo cep pallati i mbushur me pisllëqe elektorale, është një Tiranë që e lamë pas në 2015.
Për sa i përket skuadrës time, ekipit që unë përfaqësoj, ne nuk do të prodhojmë asnjë ndotje gjatë këtyre 30 ditëve të fushatës, sepse besoj se një nga mënyrat se si mund të ndihmojmë pastruesit është duke prodhuar sa më pak ndotje, për të treguar që fushatat moderne, Tirana moderne, komunikimi modern, nuk është ai i zhulit, sharjeve, i letrave, i pisllëqeve, farave, shisheve nëpër mitingje, por i gjelbërimit, i pastrimit të një kulture evropiane”, tha Veliaj./m.j
