Dy ditë pas vdekjes së 25 vjeçarit Flamur Sulaj nga Miloti, në qelinë e burgut të Shënkollit i përfshirë nga flakët, flasin familjarët e tij.
Babai i viktimës, Nuredin Sulaj në një intervistë për Report TV thotë se djali i tij është vrarë qëllimisht.
Ai mohon që 25 vjeçari të ketë pasur probleme mendore, siç janë shprehur burime pranë burgut të Shënkollit në Lezhë, ndërsa i bën thirrje autoriteteve shtetërore që të zbardhin ngjarjen, pasi siç thotë ai, në mungesë të drejtësisë nga shtetit shqiptar, do t’i drejtohet Gjykatës së Strasburgut.
“Djali im është vrarë qëllimisht, nuk ka patur probleme mendore siç pretendojnë. I kërkoj shtetit që të zbardhë ngjarjen, pasi djalin ma morën të gjallë dhe ma sollën të vdekur. Unë do e kërkoj të drejtën deri në Strasburg”, u shpreh Nuredini.
Edhe vëllai i Flamurit, Agron Sula kërkon zbardhjen e ngjarjes pasi siç shprehet ai ajo që ndodhi brenda burgut është një ngjarje shokuese dhe mjaft e rëndë.
Flamur Sulaj, 25 vjeç, nga Miloti, humbi jetën në burgun e Shënkollit si pasojë e flakëve që përfshinë qelinë e tij. Institucionet përgjegjëse ende nuk kanë një version përfundimtar së kësaj ngjarje të rëndë e cila gati përfundoi në kufijtë e një tragjedie.
Të plagosur mbetën edhe 9 të burgosur të tjerë.
shqiptarja.com/d.i.
