Një dëshmi e re u publikua sot në News 24 për vdekjen e emigrantit shqiptar nga Lezha, Pëllumb Marnikollaj në rrethana ende të paqarta.
Familjarët akuzojnë policinë greke se e kanë dhunuar deri në vdekje, ndërkohë që ata thonë se i riu është vetëhedhur nga kati i katërt i komisariatit të policisë.
Personi që dëshmon është miku i Pëllumb Marnikollajt me inicialet F.H që e ndoqi çështjen nga fillimi deri në fund.
Është filmuar me shpinë pasi akoma nuk i ka ikur tmerri që ka parë tek shoku i tyre dhe i frikësohen policisë tani për tani. F. H. është futbollistë profesionist në një skuadër greke.
Ai tregon për News 24 se shokun e tij e kishin varrosur, pa njoftuar familjen, pasi e kishin mbajtur 4 ditë në frigorifer në morgun e spitalit. F.H tregon kalvarin e kërkimeve nga komisariati i policisë, në spital e më pas në varreza, ku mundën të shohin trupin e viktimës plot me shenja.
