Disa protestues i janë përgjigjur thirrjes së ‘Rithemelimit’ për të protestuar për vdekjen e Lear Kurtit. Mes tyre disa njerëzit e Sali Berishës, Çlirim Gjata e Bardh Spahia. Ata janë mbledhur në sheshin para Ministrisë së Brendshme, ndërsa të pranishëm janë dhe eksponentë të PD dhe ‘Rithemelimit’.
Në minutat e para ka pasur tensione pasi protestuesit kanë hedhur miell në drejtim të policëve duke bërtitur: “Kjo është kokaina juaj”. Kështu i përgjigjen ekspertizës se Lear Kurti ndërroi jetë nga mbidoza pasi gëlltiti 2 qese kokainë kur po ndiqej nga policia.
Edhe më parë, një nga protestuesit ka kaluar rrethimin e policisë duke hedhur dhe piketat e vendosura. Kur është larguar, është paralajmëruar nga oficeri i policisë që të mos e kalojë sërish rrethimin pasi është e ndaluar. Por vetëm pak minuta më vonë, tentoi sërish të kalonte rrethimin e policisë dhe filloi të hidhte domate, por u ndalua nga efektivët.
/a.r
