Gjykata ka lënë në burg dy drejtuesit e mjeteve që u përfshinë në një aksident pak ditë më parë tek Xhamlloku, që i mori jetën 2 kalimtarëve. Togat e zeza caktuan masën e sigurisë ‘arrest me burg’, për Edmond Muratin dhe Etjon Lazrin.
Nga aksidenti humbën jetën Erion Balla, 36 vjeç nga Rrësheni dhe 72-vjeçarja Idajete Salliu.
PAMJET FILMIKE
‘News 24’ dhe ‘BalkanWeb’ publikuan ditën kur ndodhi ngjarja videon ekskluzive të aksidentit, ku nga pamjet filmike, aksidenti ishte shkaktuar nga Golf-i, i cili në tentativë për t’u kthyer në një rrugë dytësore, i preu rrugën automjetit ‘Volkswagen New Beatle’ i cili përplasi më pas dy kalimtarët, Erion Ballën dhe Hidajete Salliun.
Automjeti tip ‘Golf 4’ sapo do kthehej në rrugë dytësore kur nga mbrapa po vinte automjeti tip “Volkswagen New Beatle”. Golf-i i preu rrugën automjetit tjetër duke i prishur ekulibrin. Nga pamjet duket se si automjeti tjetër del nga rruga dhe më pas përplas këmbësorët për vdekje.
