Policia e Shtetit ka reaguar dy ditë pas vdekjes së Enea Ftojit në Komisariatin e Policisë së Korçës. Policia mohon të jetë ushtruar dhunë ndaj të ndjerit, pretendim ky i ngritur nga familjarët.
Në deklaratën e policisë thuhet se, “reagimi vjen lidhur me lajmin e publikuar, ku ngrihen dyshime për humbjen e jetës së një të riu të shoqëruar në Komisariatin e Policisë së Korçës”.
Policia sqaron se Enea Ftoji ishte kapur në flagrancë, ndërsa kishte vjedhur varësen e një 60-vjeçareje dhe është shoqëruar në polici.
Nga kamerat e sigurisë vihet re se, veprimet e tyre janë kryer me korrektësi të plotë, thuhet nga policia. Gjatë qëndrimit në dhomat e sigurisë, këtij shtetasi për dy ditë i është dhënë ndihmë mjekësore nga një ndihmësmjek, nëpërmjet medikamentit “Diazepan”, pasi kishte shfaqur shenja ankthi dhe në orën 8 të mëngjesit të 17 majit u gjet i vdekur në qeli.
Policia sqaron se nga këqyrja e jashtme e trupit të viktimës në Morgun e Spitalit Korçë nuk janë konstatuar shenja të përdorimit të dhunës. Ky konstatim jepet ndërsa ende nuk ka dalë akti mjekoligjor, që përcakton shkakun e vdekjes./a.m.
