Edmond Kallari pas arrestimit, por edhe në gjykatë deklaroi se nuk e njihte dhe se nuk ka punuar me fadromë në vendin ku ishte përcaktuar që të punonte 17 vjeçari, por nga pamjet e kamerave të sigurisë rezulton se shoferi i fadromës ka punuar në vendin ku atë natë, në 7 gusht ka bërë seleksionimin e kanaçeve i riu.
Gjithashtu kamerat e sigurisë kanë fiksuar edhe momentin kur Ardit Gjoklaj ka hyrë në mbrëmje në landfillin e Sharrës, por edhe në mesnatë ku del për një moment me një nga punëtorët. 17 vjeçari mendohet se ka qenë në gjumë në momentin që është goditur fatalisht nga fadroma, ndërsa pritet ekspertiza mjeko ligjore për të përcaktuar zyrtarisht shkaqet.
Pas ngjarjes së rëndë përgjegjësi i firmës “3K”, që punon në landfillin e Sharrës Besnik Braha, përgjegjësi i turnit Dëfrim Hakrama dhe shoferi i ekskavatorit, Edmond Kallari do të hetohen nën masën e sigurisë “arrest me burg” për shkeljen e rregullave të sigurimit në punë.
Gjykata ka liruar përgjegjësin e punëtorëve, Bujar Dajën, duke caktuar masën e sigurisë “detyrim paraqitjeje” për të. Të katër këta persona, së bashku me administratorin e firmës, Adurim Teqja, që është në kërkim, akuzohen se duke shkelur rregullat e marrjes dhe sigurimit në punë i kanë shkaktuar vdekjen 17-vjeçarit Gjoklaj.
ma.me
