Procesi i rinumërimit të votave për qarkun e Tiranës parashikohet që të mbyllet të hënën e ardhshme. Kështu u shpreh anëtari i Komisionit të Ankesave dhe Sanksioneve, Koli Bele, i cili pohoi se ky proces është vetëm për rivlerësimin e votave dhe jo për të hetuar nëse është tjetërsuar vota para, gjatë dhe pas procesit të votimit.
“Duhet të kuptojmë se ky proces në vetvete nuk bën hetimin për kuti, por rinumërohen dhe dalin në një rezultat përfundimtar. Për të konkluduar nëse në një rast ka diferenca të mëdha apo jo qëllim kriminal, duhet hetuar në një proces tjetër”, tha Bele.
I pyetur nëse anëtarët e KAS kanë vërejtur anomali gjatë procesit të rinumërimit për lëvizje të shumta votash brenda një kutie, Bele pohoi se deri më tani nuk ka ndodhur një gjë e tilllë, por shmangu përgjegjësinë për të qenë ata hetuesit e krimeve zgjedhore.
Lidhur me ankesat e palëve drejtuar KAS, se nuk po vlerësojnë njësoj votat e dyshimta, Bele pohoi se të gjithë kandidatët por edhe subjektet po trajtohen njësoj.
