Dega e PD në Vaun e Dejës ka ngritur një shqetësim mbi shitblerjen e votës nga ana e Tom Doshit.
Në një reagim të shpërndarë për mediat, PD thotë se Doshi ka ngritur një grup criminal që kërcënon që të mos votohet kandidati democrat Zef Hila, dhe nga ana tjetër po paguan 10000 lekë për çdo votë.
“Denoncojmë fenomenin e shëmtuar të shitblerjes së votës në bashkinë Vau Dejës nga Tom Doshi. Këto ditë Tom Doshi ka aktivizuar arsenalin e tij kriminal të qarkut të Shkodrës, element me precedent penal, banditë që lëvizin të armatosur, ditën dhe natën, me makina pa targa, me xhama të zinj, duke i bërë presion votuesve, e duke i dhënë 10 mijë lekë të reja në këmbim të votës. Ju bëjmë thirrje banorëve dhe votuesve të Bashkisë Vau Dejës: mos bini viktima të këtij personi me rrezikshmëri shoqërore dhe të kësaj dukurie me pasoja katastrofike”, thuhet në reagimin e degës së PD.
Dega e Partisë Demokratike në Vaun e Dejës, deklaron se Tom Doshi shfaqet një herë në 4 vite në zonë dhe forca e tij janë paratë e pista. PD u ben thirrje votuesve të mos bien pre e provokimeve dhe të mos shesin votën”, shkruan PD, Vau Dejës.
