Duke i krahasuar me grerëzat disa gjyqtare e prokurorë, kryetarja e Komisionit të Ligjeve, Vasilika Hysi e akuzoi këtë kategori se po krijon vështirësi në zbatimin e reformës në drejtësi.
“Kur kemi marrë paketën ndryshimeve kushtetuese të reformës në drejtësi kur lexonim ligjet na pëlqenin na dukeshin shumë të mira, por kur i rilexuam kuptuam se kemi futur dorën në folenë e grerëzave, pra ka shumë rezistencë pasi ka shumë nevojë për ndryshime. Shumë gjyqtarë dhe prokurorë të ndershëm i mirëpresin, por nuk kanë atë kurajon të dalin hapur dhe të thotë këto janë ligjet që ne kemi nevojë. Ndërkohë që një pjesë tjetër e gjyqtarëve e prokurorëve tamam si ato grerëzat janë sulur në të gjitha drejtimet dhe kanë krijuar një sërë vështirësish në zbatimin e kësaj reforme”, tha Vasilika Hysi, kryetare e Komisionit të ligjeve.
Siç e shikon zonja Hysi, pickues është edhe vendimi i Gjykatës Kushtetuese për ligjin e statusit të gjyqtarëve.
“Vendimi i Gjykatës Kushtetuese për ndryshimin e disa neneve për zëvendësimin apo deklarimin antikushtetues të disa neneve na ka vënë në vështirësi, pasi nuk e kuptojmë çfarë kanë dashur të thonë dhe çfarë duhet të bëjmë, pra nuk jemi në gjendje të draftojmë ndryshimet që duhen, nuk dimë çfarë duhet të shtojmë”, tha Hysi.
Por sipas Avokatit të Popullit, panorama për reformën në drejtësi paraqitet “frëngji përmbi frëngji” , ndaj dhe apelit i tij iu drejtua politikes.
“Avokati i Popullit nxit dhe inkurajon forcat politike të shfaqin vullnet për përmbushjen dhe çuarjen deri në fund të kësaj reforme”, tha Totozani.
Në tryezë e koalicionit drejtësi për të gjithë ekspertët e nivelit të lartë për reformën, të shkollës së magjistraturës dhe fakultetit juridik diskutuan mbi rolin dhe funksionimin e institucioneve të reja të sistemit të drejtësisë./Top Channel
