Ditën e sotme kryetari i grupit parlamentar të LSI, Petrit Vasili ka dhënë një intevistë për BW, duke folur në cilësinë e kryetarit të Komisionit të Shëndetësisë.
Vasili, i cili ka qenë edhe më herët kryetar i këtij komisioni, por edhe ministër i Shëndetësisë në qeverinë “Berisha”, ka deklaruar ndër të tjera se ai vetë, në kohën kur ishte Ministër në qeverinë me Kryeministër Edi Ramën, ka bllokuar për 1 vit listën e barnave.
Vasili e ka argumentuar këtë bllokim me detaje teknike. Por në Shqipëri, shpesh herë, mjafton të “gërmosh” fare pak prapa sulmeve politike, për të kuptuar se “ku fle lepuri”. Sepse lajmi është ai që fshihet, pas asaj që thuhet nga politikanët.
A ka qenë vërtetë Petrit Vasili i shqetësuar për detajet teknike? Apo ka diçka tjetër, që e nxit gjithmonë pikërisht Vasilin, të kërcejë përpjetë, dhe të sulmojë fort, kur vjen puna të barnat?
Sigurisht, monopolin e të vërtetës absolute nuk e ka askush dhe dora në zjarr nuk vihet për askënd, por ama, që qytetarët të kuptojnë arsyet e shpërthimeve të herëpashershme të Vasilit, padyshim që ia vlen të hidhet një sy edhe në anën tjetër të medaljes. Duke renditur disa fakte, që nxjerrin zbuluar lidhjet e tij me biznesin e barnave, e bashkë me të, edhe konfliktin e interesit të një politikani, që këtë sektor, për arsye të kuptueshme, e ka fort për zemër.
Eshtë fakt që në vitin 2011, kur Petrit Vasili ishte ministër i Shëndetësisë, shefi i Urdhrit të Farmacistëve Shqiptarë, Arjan Jaupllari, në një intervistë për gazetën “SOT”, e akuzonte kreun e dikasterit të Shëndetësisë së asaj kohe, pikërisht Petrit Vasili, për keqmenaxhim të sistemit shëndetësor, veçanërisht të sistemit spitalor, për qëllime personale përfitimi. Kjo sipas Jaupllarit, ka sjellë gjendjen mizerabël në të cilën janë katandisur spitalet në vendin tonë.
Është fakt që kushëriri i parë i Vasilit, është pronar i kompanisë farmaceutike “MEGAFARMA”, një nga kompanitë më të mëdha në tregun e kontratave te furnizimit me barna, të institucioneve mjekësore shtetërore.
Mediat kanë raportuar se sipas të dhënave zyrtare, rezulton se 60 % të tenderëve të ilaçeve i ka marrë vetëm firma “MEGAFARMA”, me pronar kushëririn e parë të Vasilit.
Më poshtë, një pjesë nga intervista e Jaupllarit:
“Përse spitalet nuk kanë barna? Mungon buxheti, apo keqpërdoret ai që është?
Të thuash se buxheti është i mjaftueshëm, do të thotë se nuk njeh nevojat në rritje për shëndet të popullatës. Të thuash se buxheti për barnat nuk është rritur, edhe kjo nuk është e vërtetë. Mjafton të bëjmë një krahasim me vitin 2005 dhe mund të themi se është trefishuar. E vërteta për mungesën e barnave në spitale, është keqpërdorimi dhe korrupsioni me buxhetin e barnave.
– Ne të gjithë e dimë se edhe buxhetet e barnave spitalore jepen dhe kontrollohen nga ISKSH.
“Çfarë lidhjesh ka kjo me Ministrinë e Shëndetësisë?
Kjo e vërtetë ekziston vetëm në letër, sepse në fakt ndodh ndryshe dhe deri më sot për buxhetet e spitaleve, ISKSH ka vetëm “çelësat e kashtës”. Çdo gjë është në dorë të Ministrit të Shëndetësisë dhe drejtorëve “sejmenë” të spitaleve.
– Ministri Vasili, pas çdo akuze që i bëhet në lidhje me tenderat, është shprehur se Ministria e Shëndetësisë nuk bën tendera, sepse ato zhvillohen në mënyrë elektronike?
Po, është shumë e vërtetë elektronika e Vasilit, prandaj tenderat i fiton të gjitha djali i tezes së tij me “Megafarmën” e famshme, apo “Megavjedhjen” që po quhet sot.
– Zoti Jaupllari, ka disa urdhra të ministrit Vasili për mirëmenaxhimin e barnave. Si i konsideroni ato?
Ministri Vasili ka nxjerrë aq shumë urdhra sa mund ta quajmë rekord për hobin e tij. Ai po e drejton Ministrinë e Shëndetësisë, jo në bazë të legjislacionit në fuqi, por në bazë të urdhrave të tij, të cilët janë të kundërligjshëm. Këtë e tregon edhe fakti që nuk janë zbatuar asnjëherë. Më kanë ngelur në mendje dy prej tyre. Njëri, që detyronte mjekët e spitaleve të mos lëshonin receta për barnat që nuk gjendeshin në spital, që do të thotë të mos mjekohej i sëmuri; i dyti, në lidhje me vendosjen e një vule të kuqe për çdo kuti bari, duke trumbetuar me të madhe në media se kishte zbuluar shkakun përse spitalet nuk kanë barna. Por në fakt do të largojë gjurmët e abuzimit, sepse siç thotë tashmë populli për të: “Ministri Vasili, pasi i nxori spitalet me këpucë të kuqe, po ju vë edhe vulën e turpit”.
Janë argumenta, të cilat koha i vërtetoi, me mënyrën se si e udhëhoqi Petrit Vasili atë institucion.
Janë argumenta që, e bëjnë të pashmangshëm lindjen e një dyshimi të madh: janë detajet teknike, arsyeja përse Petrit Vasili bllokoi për një vit listën e barnave të rimbursueshme? Janë arsye shtetërore? Apo thjesht… familjare./Lexo.al
