Pas deklaratës së Sekretarit të Përgjithshëm të LSI-së Luan Rama se qeveria duhet të jetë më e përgjegjshme në leximin e raportit të FMN-së, ka reaguar Kreu i Grupit Parlamentar të LSI Petrit Vasili, duke e cilësuar deklaratën e Ramës si një qëndrim të tijin personal dhe jo të Lëvizjes Socialiste për Integrim.
“Qëndrimi i z. Luan Rama lidhur me raportin e Fondit Monetar Ndërkombëtar nuk është një qëndrim zyrtar i Lëvizjes Socialiste për Integrim. Është një lexim individual i tij i këtij raporti. Bashkëpunimi konstruktiv me FMN-në është me rëndësi për vazhdimin me sukses të reformave të nisura”, – sqaroi Vasili në një prononcim për median.
Deklarata e Luan Ramës u bë pak orë më parë, ku sekretari i përgjithshëm i LSI tha se qeveria duhet të jetë më e përgjegjshme dhe të lexojë siç është shkruar raporti i Fondit Monetar Ndërkombëtar.
“Qeveria duhet të dilte me një reagim për raportin e FMN. Raporti më i fundit kërkon seriozitet dhe maturi në leximin e tij, sepse sa herë që qeveria shqiptare nuk e ka konsideruar me seriozitet jemi ballafaquar me fenomene krizash. Më lejoni të kujtoj krizën e vitit 1997, apo edhe disa qëndrime të mbajtura para disa vitësh në papërgjegjshmëri. Ne ofrojmë të gjithë mbështetjen dhe bashkëpunimin, për reflektimin e përgjegjshëm ndaj vërejtjeve apo konstatimeve që bën raporti. Edhe njëherë ftoj qeverinë të reflektoj me seriozitet, të reflektoj me përgjegjshmëri, të reflektojë drejtpërdrejt ashtu siç është shkruar raporti. Madje duhet lexuar edhe me më shumë konsistencë se Raporti i Venecias.”- tha në fjalën e tij Luna Rama.
