Ministri grek i financave vazhdon të habisë botën. Ai ka vajtur në mbledhjen e fundit të ministrave të financave të Eurogrupit, me një përgjues në xhepin e xhaketës. Varufakis ja zbuloi vetë këtë detaj gazetës së madhe Nju Jork Tajms, duke u përpjekur të provojë se në atë mbledhje nuk kishte marrë kritika të ashpra nga ministrat e tjerë të financave. Duhet thënë se këto mbledhje klasifikohen nga vetë Eurogrup me statusin mes sekretit dhe materialit të rezervuar.
I menjëhershëm ka qenë reagimi i presidentit të Eurogrupit, holandezit Dijsselbloem, i cili i ka tërhequr vëmendjen Varufakisit që të mos bëjë publike ato që ka regjistruar në atë mbledhje. “Takimet e Eurogrupit janë konfidenciale, tha ai. Besojmë se çdo pjesëmarrës në mbledhje do ta respektojë këtë gjë”. Ministri grek ka nxjerrë një komunikatë, ku garanton se do t’i përmbahet natyrës së rezervuar të mbledhjes dhe se nuk do të publikojë asgjë nga ato që janë thënë në atë takim.
