Për historianin Paskal Milon nuk duhet të ketë debat mbi nevojën e mirëkuptimin për zhvarrimin e ushtarëve grek të rënë në Shqipëri. Sipas tij ata erdhën në vendin tonë në ndjekje të pushtuesit italian dhe për këtë ai thotë se shqiptarët duhet të jenë të ndershëm. Ndaj ai shprehet se debati për këtë çështje nuk ka kuptim dhe se nisja e operacionit për gjetjen dhe zhvarrimin është produkt i një marrëveshje që ishte bërë që nga qeveria e mëparshme.
“Qeveria shqiptare aktuale nuk bën gjë tjetër veçse po zbaton një marrëveshje të nënshkruar nga qeveria e kaluar. Ajo po e detajon atë qartë. Ushtarët grekë të rënë në Shqipëri, gjatë luftës italo-greke, nuk erdhën si pushtues, për këtë duhet të jemi të ndershëm, por ata erdhën në vijim të luftimeve që u bënë me ushtrinë italiane, e cila sulmoi Greqinë nga toka shqiptare dhe kjo ushtri ishte po kaq pushtuese e agresore siç ishte ndaj Greqisë dhe Shqipërisë”, shprehet Milo gjatë një interviste për Channel One.
Ndërkohë që sa i përket çështjeve të tjera që janë pjesë e bisedimeve Shqipëri- Greqi, ish-ministri i Jashtëm pranon se arritja e kompromisit për to është i vështirë, gjithsesi ai thekson se zgjidhja është e mundur.
“Vështirësitë janë të njohura, pritshmëritë nuk duhet të jenë të mëdha dhe të menjëhershme, për të arritur kompromise për marrëveshjet siç është: Çështja e heqjes së ligjit të luftës, çështja për kufirin detar mes dy vendeve apo edhe zgjidhja e çështjeve praktike për qytetarët shqiptar, si: vula apostile apo njohja reciproke e patentave ndërkombëtare që kanë të bëjnë me qytetarët shqiptarë që janë shumë të rëndësishme dhe besoj se do të zgjidhen”, thotë Milo.
