Komisioneri europian për Zgjerimin, Oliver Varhelyi theksoi sot se hyrja në Bashkimin Europian e vendeve të Ballkanit Perëndimor ishte më shumë se kurrë një prioritet i Brukselit.
Varhelyi i bëri këto deklarata gjatë një vizite në Serbi, pas propozimit të Komisionit Europian, që u paraqiti shteteve anëtare një procedurë të re më strikte për anëtarësimin dhe e ndryshueshme, me qëllim për t’iu përgjigjur kushteve të paraqitura nga Franca për hapjen e negociatave me Shqipërinë dhe Maqedoninë e Veriut, para një samiti mbi Ballkanin që do të mbahet në muajin maj.
Bashkimi Europian duhet të përpiqet tashmë të ruajë besimin në Ballkan pas bllokimit në tetor të hapjes së negociatave me Shqipërinë dhe Maqedoninë e Veriut, që çoi në një shtyrje tjetër, edhe pse këto dy vende kishin realizuar reforma të rëndësishme për përmbushjen e kritereve të anëtarësimit.
“Me Komisionin e ri, politika e zgjerimit të BE-së në Ballkanin Perëndimor është më shumë se kurrë një prioritet”, deklaroi Varhelyi në përfundim të një takim me presidentin serbe, Aleksandar Vuçiç.
“Dëshiroj riforcimin e lidhjeve tona me Ballkanin, veçanërisht me ata që po negociojnë tashmë për hyrjen e tyre në BE”, shtoi ai.
Përsa i përket Shqipërisë dhe Maqedonisë së Veriut, Varhelyi theksoi se shpresonte që vendet anëtare do t’i hapin dritën jeshile në samitin mbi Ballkanin, parashikuar në maj.
/a.r
