Shtetet e Bashkuara të Amerikës mbështesin klimën e të bërit biznes në thithjen e investimeve të huaja dhe mbrojtjen e interesave strategjike të vendit. Në një moment kur projekti për Zvërnecin ka ngjallur debate e protesta, e ngarkuara me punë e SHBA-ve në Shqipëri tha se shumë investitorë amerikanë operojnë në sektorë strategjikë dhe të tjerë po shqyrtojnë mundësinë për të ardhur.
“Kuadri ligjor shqiptar për shqyrtimin e investimeve të huaja direkte është një zhvillim i rëndësishëm”, duke theksuar se ai nuk përbën thjesht një ushtrim burokratik, por një deklaratë strategjike që tregon se Shqipëria është e hapur për investime, duke mbrojtur njëkohësisht interesin kombëtar dhe duke përmbushur standardet ndërkombëtare. Investitorët, përfshirë ata amerikanë, po e ndjekin me vëmendje këtë proces dhe se kompanitë amerikane janë të pranishme në sektorë si energjia, ndërtimi dhe teknologjia, ndërsa të tjera po shqyrtojnë mundësinë për të investuar në Shqipëri. Investitorët kërkojnë rregulla të qarta, kushte të barabarta konkurrimi dhe mbrojtje të sektorëve strategjikë. Miratimi i këtij kuadri ligjor është vetëm fillimi dhe se zbatimi i tij do të jetë vendimtar për suksesin e mekanizmit.”
Ministrja e Ekonomisë, Delina Ibrahimaj, tha se nisma synon të forcojë rregullat dhe të rrisë besimin e investitorëve të huaj në Shqipëri.
Mekanizmi Shqiptar për Shqyrtimin e Investimeve të Huaja Direkte është një instrument i ri që synon forcimin e sigurisë ekonomike të vendit dhe mbrojtjen e sektorëve strategjikë. Ekonomia shqiptare ka regjistruar rritje të vazhdueshme të investimeve të huaja direkte, të cilat gjatë vitit të kaluar arritën mbi 1,6 miliardë euro.
